12-январдиз Дагъустандин Кьилин везифаяр вахтуналди тамамарзавай Сергей Меликова коронавирусдихъ галаз женг чIугвадай Оперштабдин цIийи йисуз сад лагьайди тир заседание кьиле тухвана.
Сифте нубатда республикадин регьберди цIийи йисан тIатIилрин вахтунда здравоохраненидин къурулушди чпин везифаяр кIвалахдиз кьецI тагана кьилиз акъудайди къейдна. И жигьетдай ада региондин здравоохраненидин министерстводин, Роспотребнадзордин республикада авай Управленидин кьиле авай ксариз кьиле тухвай кIвалахдай сагърай лагьана.
Заседанидал Дагъустандин вице-премьердин везифаяр вахтуналди тамамарзавай Анатолий Къарибова Оперштабдин виликдай кьабулнавай къарарар кьилиз акъудзавай тегьердикай галай-галайвал суьгьбетна. Гьа гьисабдай яз, вице-премьерди COVID-19 азардиз акси вакцина ягъун лазим тир агьалийрин гьал ахтармишун ва вакцина санай масаниз тухун патал РД-дин Минздравдиз 5 миллиондилай виниз пул чара авунвайдакайни хабар гана.
Анатолий Къарибов кьилди дарманралди таъминарунин месэладални акъвазна: къенин юкъуз медицинадин идарайра 25 дармандикай ибарат тир резерв арадал гъанва. Идалайни гъейри, амбулаторный къайдада сагъарзавай азарлуяр патални медицинадин идарайриз лазим дарманар агакьарзава ва абур пайзава. ИкI, 2200-далай виниз азарлуйрив герек дарманар агакьнава. Мадни, республикадин стационарарни 3,5 миллион манатдин кьадарда аваз дарманралди таъминарнава. Дарманралди таъминарунин месэладал, вице-премьердин везифаяр вахтуналди тамамарзавайдан гафаралди, гуьзчивал авун давам жезва.
Геж тавуна, алатай йисан декабрдиз, коронавирусдин азар дуьздал акъудзавай ва сагъарзавай 12 агъзурдалай виниз медработникриз, санлай къачурла, 320 миллион манатдилай артух кьадарда аваз махсусдаказ тайинарзавай алава пулар гана. Тайин себебар аваз и пулар таганвай 113-далай тIимил ксарив абур и мукьвара агакьда.
Дагъустанда эпидемиологиядин жигьетдай алай вахтунда арадал атанвай гьаларикай Роспотребнадзордин региондин Управленидин регьбер Николай Павлова галай-галайвал суьгьбетна. Адан гафаралди, эхиримжи суткада чеб лабораториядин анализрин куьмекдалди тестикьарнавай, COVID-19 азар квай 159 дуьшуьш дуьздал акъуднава. Эхиримжи пуд гьафтедин муддат фикирда аваз къимет гун яз, гьалар хъсан патахъ дегиш жезва. Республикадин муниципалитетра гьалар гьар сана са жуьре я. Амма, ада къейд авурвал, абурукай 23 районда гьалар хъсанвилихъ дегиш жезва, 5 районда лагьайтIа, коронавирусдин азар акатайбур малум туш.
Санлай къачурла, республикада эпидемиологиядин гьалар чIурубур яз амукьунин себебрикай сад яз Николай Павлова агьалийри маскайрин режимдал амал тавун къейдна: азарлу хьайибурукай 62 процентди маскаяр алукIнавачир. Гзаф инсанар кIватI жезвай чкайриз финни азар акатунин себебрикай сад тирди лагьана. Чир хьайивал, азарлу хьайибурукай 23 процент инсанар рагьметдиз фейи чкайриз, мехъеррик, алишверишдин еке центрайриз, базарриз фенвайбур тир.
Арадал атанвай гьалар фикирда кьуналди, Николай Павлова Дагъустанда самоизоляциядин режим 65 йисалай виниз яшара авай агьалияр патал 28-январдалди давамарун теклифна. Виликдай кьабулнавай сергьятламишунарни кардик кумукьун давам жеда.
Заседанидал коронавирусдиз акси вакцина ягъунин месэладални кьилди акъвазна. Дагъустандин здравоохраненидин министрдин везифаяр вахтуналди тамамарзавай Татьяна Беляевадин гафаралди, азардиз акси рапар ягъун патал республикада 27 пункт кардик ква. И кар кьилиз акъуддалди виликамаз ивидик антитела квани квачни мажбуридаказ ахтармишда. Республикадин вири пунктариз вакцина агакьарнава ва ам махсус холодильникра хуьзва.
Заседанидикай гегьеншдиз РД-дин Кьилин сайтдай кIелиз жеда.
Чи мухбир
