Вакцина къачуз кIанзава

Мексикадин гьукуматдиз коронавирусдиз акси Россиядин “Спутник V” вакцинадин миллионралди дозаяр маса къачудай къаст ава. Идакай “Новости” РИА-ди хабар гузва.

“Чна Россиядин официальный векилрихъ галаз гуьруьш кьи­ле­ тухвана, виликамаз бязи меслятарни авунва”, — лагьана Мекси­ка­дин здравоохраненидин министрдин заместитель Лопес-Гатела.­

Виликамаз авунвай меслятрал асаслу яз, Мексикадиз вакцинадин 24 миллион доза маса къачудай мумкинвал жеда.

Къейд ийин, тIвар кьунвай вакцина Россиядин Гамалеядин тIварунихъ галай НИЦЭМ-да арадал гъанва, ам дуьньяда регистрация авунвай коронавирусдин сад лагьай вакцина я.

МетIерал акъваздач

“БЕЛТА” чешмеди раижзавайвал, Белоруссиядин президент А.Лукашенко оппозициядин векилрихъ галаз суьгьбетар кьиле тухуз гьазур я.

Искусстводинни спортдин хиляй премияр вахкудайла Лука­шен­коди рикIел хкайвал, 11-январдиз ада хоккейдин международ­ный федерациядин кьиле авайбурухъ галаз и йисуз дуьньядин чемпионат тешкилунин гьакъиндай рахунар кьиле тухвана.

“Рахунар, веревирдер куьтягьизни хьанач, “чи катайбур” рагъ­экъечIдай патан лап хъсан, чи тереф хвейи ва хуьзвай дустарал тепилмиш хьана”, — лагьана А.Лукашенкоди. Ада тестикьарайвал­, Белоруссия акъажунар гьатта къе кьиле тухузни гьазур я. Амма и кар патал тамамар хъувуна кIани крар ама.

“Чун адалатлу гьар гьи ксарихъ галаз хьайитIани ихтилатар ийиз гьазур я. Гьа жергедай яз — оппозициядихъ галазни. Амма хаинрихъ галаз — ваъ”, — малумарна Белоруссиядин регьберди.

Адан гафаралди, уьлкведин гьукумдарар гьар гьихьтин месэладин патахъай хьайитIани, суьгьбетар кьиле тухуз гьазур я. Гьа жергедай яз, конституциядик дегишвилер кухтуникайни, уьлкведин гележегдикайни. “Амма садан виликни чун метIерал акъваздач!” — кьетIивилелди вичин фикир жем авуна Лукашенкоди.

Ракьун рехъ жеда

Эрменистанди Азербайжандай тIуз Россиядиз фидай ракьун рехъ кардик кутадайвал я. Идан гьакъиндай Азербайжандин президент И.Алиева малумарна, хабар гузва “Sputnik Ближнее зарубежье” чешмеди.

Адан гафаралди, ракьун рехъ ачухуни Россиядин, Азербайжандин ва Эрменистандин итижриз жаваб гузва. Къейд авурвал, Дагълух Къарабахда арадал атай къалмакъал кьулухъ галама, гила гележегдикай фикирна кIанзава.

Къейд ийин, 11-январдиз Москвада В.Путинан, Н.Пашинянан ва И.Алиеван гуьруьш кьиле фена. Саки кьуд сятда давам хьайи гуь­руьшдин нетижада малум хьайивал, къалмакъалдик хьайи кьве тереф военный есиррин гьакъиндай са икьрардал атанач. “Лента. ру” чешмеди хабар гузвайвал, Пашиняна Дагълух Къара­бах­дин статусдин месэла гьялиз хьанвачирди къейд­на. Гьа са вах­тунда Алиева вич нетижа арадал гъунин къайгъуда ава лагьа­на.

Алатай йисан 27-сентябрдилай Къарабахда гатIунай къалмакъал 9-ноябрдалди давам хьана. Алай вахтунда а регионда ислягьвал хуьн патал Россиядин векиларни ава.

Теклифнава

США-да хкянавай цIийи президент Жозеф Байден шад гьалара вичин къуллугъдив эгечIуниз талукь мярекатда иштиракун патал Россиядизни теклифнава. ТАСС-ди раижзавайвал, идакай Вашингтонда авай Россиядин векилханади хабар гана.

Векилханадин къуллугъчиди къейд авурвал, Россиядиз векилдин дережада аваз мярекатда иштиракдай фикир ава. Байден США-дин кьилин къуллугъдив эгечIунин мярекат 20-январдиз кьиле тухудайвал я.

Кьенвай къушарин “марф”

Италиядин меркезда 1-январдин йифен береда кьенвай къушарин “марф” къвана. Кьенвай чIулав нуькIер шегьердин са шу­муд­ райондай жагъана. Гьайванар хуьнин международный тешки­латди малумарайвал, къушар геликьун цIийи йисан суварин­ фейерверкрихъ галаз алакъалу хьун мумкин я. Идакай  “Roma­Today” чешмеди хабар гузва.

Фейерверкри къурху кутур къушар ийир-тийир, фир-тефир чка авачиз амукьна. Абур четинвилерал ацалтун ва рикI акъвазун себеб яз кьена. И агьвалат акурла, Италиядин бязи агьалийри чпихъ сувар кьиле тухудай гьевес амукь тавурдакай соцсетра кхьена. Гьайванар хуьниз талукь тешкилатри гьар йисуз петардаяр, фейерверкар маса гунал къадагъа эцигун тIалабзава.

Рекъемар артух жезва

13-январдин пакаман делилралди, санлай Россияда коронавирус акатнавайбурун кьадар пуд миллионни зурав агакьзава, кьенвайбур — 63 агъзурдав. Саки кьве миллионни кIуьд виш кас кьван сагъар хъувунва.

Санлай дуьньяда коронавирусдикди начагъ хьайибурун кьадар 92 миллиондилай алатнава. Кьенвайбурун кьадар 2 миллиондив агакьзава, сагъар хъувунвайбурун кьадар — 69 миллиондив.

«Лезги газет»