Сир туш хьи, чи йикъара Дагъустандин дагълух районрин хуьрера медицинадин жигьетдай тарифдин гьалар авач. Гьавиляй агьалийриз вахтунда чпин азарар тайинардай, абур сагъардай мумкинвални жезвач. Ихьтин шартIарикай хабар авай чи ватанэгьли, Москвадин 115-нумрадин азарханада кIвалахзавай духтур Загьир Агъамова алатай йисалай “Сагълам хуьр” лишандик кваз яшайишдин проект кардик кутунва.
Проектдин макьсад Москвадин пешекар духтуррин дестеди пулсуздаказ хуьруьн агьалийрин сагъламвал ахтармишуникай ибарат я. Сагъарунин рекьяй алай аямдин вини дережадин тадаракрин лазимвал аваз хьайитIа, начагъбуруз уьлкведин меркездиз финин меслятарни гузва.
“Сагълам хуьр” проект сифте яз ада алатай йисуз вичин ватан тир Хъартас-Къазмайрин хуьре кьилиз акъудна.
Загьир духтур кьиле аваз, мергьяматлувилин серенжемда иштиракзавай духтуррин десте и йикъара Агъул райондин Дулдугъ ва ТпIигъ хуьрериз фена. Дагълух хуьруьн агьалийрин сагъламвилин гьалариз Москвадай атанвай са жерге пешекарар килигна. Меркездай атанвай духтуррин серенжемдик чкадин духтуррини чпин пай кутазва.
“Малум хьайивал, дагълух районда гзафни-гзаф эндокринологдин, травматолог-ортопеддин, гьатта гинекологдинни игьтияж ава”, — лугьузва Загьир духтурди.
Къейд ийин, тежрибалу духтуррин дестеди кьиле тухвай мергьяматлувилин серенжемдикай РГВК “Дагъустан” телеканалдини репортаж къалурна. Анай къалурай хейлин агъулвийри духтурриз еке алхишар авуна.
Москвадин духтурри медицинадин рекьяй еке мумкинвилер авачир дагълух хуьрера и серенжем гележегдани давамардайвал я.
Лезги Фетгьуьллагь
