Россиядин печатдин йикъан вилик РД-дин Кьилин везифаяр вахтуналди тамамарзавай Сергей Меликов федеральный, республикадин ва чкадин СМИ-рин векилрихъ галаз гуьруьшмиш хьана. Мярекатда РД-дин Гьукуматдин Председателдин заместитель Анатолий Къарибова, РД-дин Кьилин ва Гьукуматдин Администрациядин Руководителдин 1-заместитель Мурад Къазиева, РД-дин Кьилин ва Гьукуматдин Администрациядин информациядин сиясатдин рекьяй управленидин начальник Рашид Акавова, РД-дин Кьилин ва Гьукуматдин Администрациядин пресс-къуллугъдин руководитель Низами Гьажибалаева, РД-дин информациядин ва печатдин министр Умаросман Гьажиева ва масабуру иштиракна.
Сифте нубатда Сергей Меликова СМИ-рин векилриз пешекарвилин сувар тебрикна ва СМИ-риз кьуд лагьай гьукум гьакI гьавая лугьун тийизвайди къейдна. “Информациядин майданда кьиле физвай крари дуьзгуьн къарарар кьабулуниз, абур кьилиз акъудуниз ва халкьдихъ галаз алакъа хуьниз таъсирзава. Лугьун лазим я хьи, алай аямда массовый информациядин такьатрин роль хкаж жезва, пешекарвилин суварни и кардихъ галаз алакъалу я”, — лагьана региондин регьберди. Ада гьакIни къейд авурвал, СМИ-яр неинки къенин йикъан гьакъикъат къалурзавай гуьзгуь, гьакI яшайишдин важиблу институт ва гьукумдив жемятдин тIварцIихъай герек хабарар агакьарзавай къурулушни я.
Дагъустандин жемятдин уьмуьрда масс-медиади къугъвазвай ролдикай лугьуналди, Сергей Меликова тIугъвалдин вахтунда СМИ-ри тухвай метлеблу кIвалахни къейдна. “ТIугъвалдин месэла анжах духтуррин, маса къурулушрин, карханайрин алахъунралди пайгардик кутаз хьун мумкин тушир, абурун куьмекдиз информациядин такьатарни атана, абуру халкь дуьз гъавурда туна. Анжах са тIугъвалдин темадикай кхьинай заз квез сагърай лугьуз кIанзавач. И четин вахтунда куьне куь хивез агьалийри сабурлувал хуьнин, абурув гьакъикъи хабарар, гьукумди кьабулзавай серенжемрин гьакъиндай малуматар агакьарунин къайгъуярни къачуна. Гила вакцинадиз ва маса крариз талукь хабарарни вахтунда ва дуьзгуьндаказ агакьарна кIанда, гьикI лагьайтIа, ихьтин серенжемри чаз тIугъвалдихъ галаз менфятлудаказ женг чIугвадай мумкинвал гузва”,- лагьана региондин кьили.
Региондин руководителди важиблу мад са темадал — ДАССР арадал атана 100 йис тамам хьунал желбна: “Юбилейдин и югъ анжах са йикъахъ галаз алакъалу авун дуьз жедач. 2021-йис Дагъустандин Виш йисан юбилейдинди я. Вири йисан вахтунда Дагъустандин юбилейдихъ галаз алакъалу шад мярекатрикай кхьена кIанда”.
Ахпа республикадин регьберди журналистрин суалриз жавабар гана.
Чилерин статусдин гьакъиндай
И месэлади, региондин Кьилин фикирдалди, Дагъустан вилик финиз кьецI гузва. Чкадин экономика вилик тухун патал пул чара ийизвай инвесторди вичин къазанжидикай фикирзавайди я. Амма адаз ишлемишиз кIанзавай чилин статус тайин туширвиляй кIвалах акъваззава. Ида рекьер туькIуьруниз, инфраструктурадин маса месэлаяр гьялунизни кьецI гузва. Ихьтин гьалара карчи, инвестор къулай маса чкадиз фида. Им лап кар алай месэла я ва ам чна датIана гуьзчивиликни кутун лазим я,- лагьана Сергей Меликова.
Азаддиз фикир лугьуникай
Сергей Меликов гьукум ачухдиз критика авунин терефдар я. СМИ кьуд лагьай гьукум я. Амма бязи журналистри ва блогерри и азадвиликай менфят къачузвай тегьердал ам рази туш. Критика ийидай чкадал критиканстводал, экъуьгъунрал, миллетчивилел машгъул жезва ва идалди инсандин намусдик хкIурзава.
Кадрийрин гьакъиндай
Сергей Меликов жуьреба-жуьре конкурсрин гъалибчийрив гьуьрметдивди эгечIзава. Анжах кIвалахал кьабулдайла, конкурсантриз регьбервал гунин жигьетдай авай тежрибадизни фикир гана кIанда. Алакьунар авай жегьилар чIехи къуллугърал (министрдин) тайинардалди, абуру маса къуллугърал тежриба кIватIун лазим я.
Дербентдин гьакъиндай
РФ-дин виридалай кьибледин шегьердиз кьетIен статус гуда ва ида ам тарихдин объект ва алай аямдин туриствилин центр хьиз вилик фидай мумкинвал артухарда. Дербентдин администрациядин кьиле авайла Хизри Абакарова шегьерда кIватI хьайи хейлин месэлаяр гьялна ва гилани ада шегьер вичин гуьзчивиликай хкуднавач.
“РД-дин лайихлу журналист” тIварцIин гьакъиндай
Ихьтин теклифдин тереф Сергей Меликова хвена ва ада талукь министерстводиз и месэладин гьакъиндай теклифар гьазурунин тапшуругъ гана.
Мярекатдин сергьятра аваз Сергей Меликова республикадин жуьреба-жуьре СМИ-ра кIвалахзавай журналистрив гьуьрметдин грамотаярни вахкана.
Гуьруьшдикай гегьеншдиз РД-дин Кьилин официальный сайтдай кIелиз жеда.
«Лезги газет»
