ТАСС-ди хабар гузвайвал, алай йисуз милли “Самурский” паркунин мулкарал герек тир инфраструктура галаз визит-центр ва музей эцигда.
Чешмедиз Дагъустандин тIебиатдин государстводин заповедникдин директордин заместитель Гьажибег Жамирзоева хабар гайивал, визит-центр тамам комплексдикай ибарат жеда. Адак инспекторар ва визит-центрадин къуллугъчияр патал махсус кIвал, ял ядай чка, улакьар ва велосипедар акъвазардай пен, шикилрин выставкаяр тешкилдай майдан, актовый зал, музей ва са жерге маса дараматар акатда.
Визит-центрада гьар са касдиз Кьиблепатан Дагъустанда милли парк арадал гъунин тарихдихъ, чкадин тIебиатдихъ, Самур тама авай гьайванрин алемдихъ галаз таниш хьун патал шартIар тешкилда.
Чешмедин малуматралди, эцигунрив алай йисан гатфарихъ эгечIдайвал я. Визит-центр лагьайтIа, 2022-йисан гатфарихъай ахъайда.
«Лезги газет»
