Алатай гьафтедин эхирра Махачкъалада коронавирусдихъ галаз женг тухудайла телеф хьайи медицинадин къуллугъчийриз бахшнавай памятник ахъайна. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, республикадин медуниверситетдин мулкарал эцигнавай памятник ачухуниз талукьарнавай мярекатда региондин Кьилин везифаяр вахтуналди тамамарзавай Сергей Меликовани иштиракна.
“Къе лишанлу вакъиа кьиле физва. Духтурар тIугъвалдик начагъ хьанвай гьар садахъ акьалтIай жавабдарвилелди, мукьуфдивди гелкъвезва, гафаралди руьгь кутазва. И кар за жувани гьиссна (С.Меликовакни коронавирус акатнай, — А.М.). Чун паталди чпин чанар къурбанд авурбурун экуь къаматриз икрамзава чна”, — къейдна Сергей Меликова мярекат ачухдайла. Ада гьакIни республикада коронавирусдин вилик пад кьунин кардик лайихлу пай кутазвай медуниверситетдин, РФ-дин ва РД-дин здравоохраненидин министерствойрин кьилевайбуруз сагърай лагьана.
Мярекатда иштиракай Урусатдин здравоохраненидин министерстводин медицинадин образованидин ва кадрийрин сиясатдин департаментдин директордин заместитель Артем Тарасенкоди РФ-дин здравоохраненидин министр Михаил Мурашкодин чар кIелна.
“Медуниверситетдин мулкарал ихьтин памятник эцигун ярж хьиз кьабулиз жеда, гьикI лагьайтIа адахъ духтуррин жегьил несил гьазурунин карда тербиядин еке метлеб ава. Малум тирвал, гележегдин духтуррин ахлакьдин, эдебдин виридалайни хъсан ерияр вузда арадал къвезва. ЦIийи монументди гьамиша жегьилрин рикIел халис духтурар гьихьтинбур хьун герек ятIа гъидайдак, абурун ватанпересвилин гьиссер мадни артух жедайдак за умудар кутазва”, — кхьенвай Мурашкоди.
Агьмед Магьмудов
