29-декабрдиз Дагъустандин Кьилин везифаяр вахтуналди тамамарзавай Сергей Меликова “РД-дин исполнительный гьукумдин органрин къурулуш” Указдал къул чIугуна. Идакай “Лезги газетдиз” республи­кадин Кьилин ва Гьукуматдин Администрациядин пресс-къуллугъди хабар гана.

ЦIийи документдал асаслу яз, РД-дин Гьукуматдин Председателдиз ирид заместитель жеда, абурукай кьвед Сад лагьайбур я.

Информатизациядин, алакъадин ва массовый коммуникацийрин министерство­дикай Дагъустан Республикадин рекъемрин рекьяй вилик финин министерство хъу­вунва.

Энергетикадин министерстводин тIвар дегиш хьанва. Икьван чIавалди эцигунрин ва ЖКХ-дин хивевай везифайрикай ЖКХ-диз талукь везифаяр энергетикадин министерстводин хиве тунва. Нетижада арадал цIийи — энергетикадин ва ЖКХ-дин министерство атанва.

Дагъустанда цIийи мад са министерство тешкилнава: информациядин ва печатдин. Адал виликдай информатизациядин, ала­къа­дин ва массовый коммуникацийрин министерстводи тамамарай везифайрикай бязибур ихтибарнава.

Региондин финансрин министерстводани дегишвилер кьиле фенва. Указдал асаслу яз, Дагъустан Республикадин государст­водин финансрин контролдин къуллугъ арадал гъанва. ЦIийи ведомстводи икьван чIа­валди финансрин министерстводин хиве хьайи бязи везифаяр кьилиз акъудда.

Капитальный эцигунрин рекьяй РД-дин Гьукуматда махсус Управление тешкилнава. Ада государстводин ва муниципалитетрин игьтияжар патал эцигзавай объектрин жигьетдай гуьзчивал тухуда.

Мадни, Сергей Меликован Указдалди, Дагъустандин Краснодардин крайда ва Санкт-Петербургда авай Векилханаяр агалнава. Абурун везифаяр РД-дин милли сиясатдин ва динрин крарин рекьяй министерстводин хиве хтунва.

* * *

Саласа юкъуз РД-дин Кьилин везифаяр вахтуналди тамамарзавай Сергей Меликова Дагъустан Республикадин Гьукуматдин членрин гьакъиндай са жерге Указрал къулар чIугуна.

Гьа икI, С.Меликован Указдалди, РД-дин Гьукуматдин Председателдин Сад лагьай заместителвиле Нуьсрет Омаров тайинарнава. Виликдай РД-дин Кьилин ва Гьукумат­дин Администрациядин Руководителдин заместителдин везифаяр тамамарзавай. Адан ери-бине Хив райондин Куштилрин хуьряй я.

Мадни республикадин премьер-ми­нистрдин Сад лагьай заместителдин къуллугъ Батыр Эмеевал ихтибарнава. Къейд ийин хьи, икьван чIавалди ада региондин промышленностдин ва алишверишдин ­ми­нистерстводиз регьбервал гузвай. Ери-бине Къи­зилюрт райондин Бавтугай поселокдай я.

РД-дин Гьукуматдин Председателдин заместителрин везифаяр вахтуналди тамамарзавайбурун арада Анатолий Къарибов, Владимир Лемешко, Абдулмуслим Абдулмуслимов ава. Рамазан Жафарова вич виликдай алай къуллугъдал (премьер-министрдин заместитель) кIвалах давамарда. Региондин Гьукуматдин Председателдин мад са заместитель яз Муслим Телякавов тайинарнава. Виликдай ада региондин культурадин министрдин сад лагьай заместителдин везифаяр тамамарзавай.

РД-дин чилин ва эменнидин алакъайрин рекьяй министрвиле Заур Эминов (виликанди — Агъарагьим Къагьиргьажиев), тIебиат­дин ресурсрин ва экологиядин министрдин везифаяр вахтуналди тамамарзавайди яз Рагьман Гьамидов (виликанди — Набиюла Къарачаев) тайинарнава. Заур Эминован ери-бине Дербент шегьердай я. Виликдай ада Дербент шегьердин мэрдин заместитель яз кIвалахзавай. Рагьман Гьамидов Дагъустандин Огни шегьердай я. ЦIийи къуллугъдал тайинардалди ада “Ботлихдин радиозавод” ООО-дин генеральный директордин везифаяр тамамарзавай.

Дагъустандин МЧС-дин министр Нариман Къазимегьамедовани жегьилрин кра­рин­ рекьяй министр Камил Саидова чеб алай­ къуллугърал кIвалах давамардайвал я.

РД-дин промышленностдин ва алишверишдин министрдин везифаяр вахтуналди тамамарзавайди яз Назим Халилов (виликанди — Батыр Эмеев), экономикадин ва мулкарин рекьяй вилик финин министрвиле Руслан Алиев (виликанди — Гьажи Султанов), хуьруьн майишатдин ва недай-хъвадай суьр­сетдин министрвиле Баттал Батталов (виликанди — Абзагьир Гьуьсейнов), энергетикадин ва ЖКХ-дин министрвиле Манвел Мажонц (виликанди — Владимир Лемешко), информациядин ва печатдин министрвиле — Умаросман Гьажиев тайинарнава. РД-дин здравоохраненидин министрдин везифаяр вахтуналди Татьяна Беляевади тамамарда.

Вахтуналди министррин везифаяр тамамарзавайбурун арада мад Малик Баглиев (эцигунрин министерство), Зарема Бутаева (культурадин министерство), Ширухан Гьажимурадов (транспортдин ва рекьерин майишатдин министерство), Энрик Муслимов (милли сиясатдин ва динрин крарин рекьяй министерство), Расул Ибрагьимов (туризмдин ва халкьдин художественный сеняткарвилерин министерство), Мегьамед Мегьамедов (физический культурадин ва спортдин ми­нистерство), Изумруд Муьгьуьдинова (зегьметдин ва яшайишдин рекьяй вилик фи­нин министерство), Юнус Саадуев (финансрин министерство), Къазимегьамед Сефи­къурбанов (юстициядин минис­терство), Уммупазиль Омарова (образованидин ва илимдин министерство) ава.

ЦIийиз арадал гъанвай рекъемрин ре­кьяй вилик финин министрдин везифаяр ­вахтуналди Сергей Снегирева тамамардайвал я.

РД-дин Кьилин ва Гьукуматдин Админи­страциядани кадрийрин жигьетдай дегишвилер кьиле фенва. Инин Руководителдин сад лагьай заместитель яз Мурад Казиев тайинарнава. Капитальный эцигунрин рекьяй­ РД-дин Гьукуматдин Управленидиз Мегьамед Азизова регьбервал гуда. Новолак районда яшамиш жезвай яхулар цIийи чкадиз куьчарунин ва Ауховский район арадал хкунин месэлайрин рекьяй кардик квай РД-дин Гьукуматдин Управленидин кьиле виликдай региондин экономикадин ва мулкарин ре­кьяй вилик финин министр яз кIва­лахай Гьажи Султанова акъвазнава.

РД-дин культурадин ирс хуьнин рекьяй Агентстводин руководителдин везифаяр вахтуналди Махач Мусаева, Государст­во­дин кIвалерин инспекциядин руководителдин везифаяр вахтуналди Сергей Касьянова кьиле тухуда. Самоходный машинар ва техникадин маса жуьреяр технический рекьяй авай гьалдал гуьзчивалдай Государстводин инспекциядин кьиле Тагьир Къагьриманов акъвазнава. Мегьамед Шапиев ве­терина­риядин рекьяй Комитетдин председателвиле тайинарнава. Жафар Гьажибегова республикадин госзакупкайрин Комитетдин председателдин везифаяр вахтуналди тамамарда.

Мадни, Урусатдин Президентдин патав гвай РД-дин Гьамишалугъ Векилдин везифаяр вахтуналди Жамаладин Гьасановал ихтибарнава. Государстводин финансрин контролдин къуллугъдиз — Махач Ибрагьимова, РД-дин тарифрин къуллугъдиз — Камил Алигалбацева ва РД-дин тамун майишатдин Комитетдиз Вагьаб Абдулгьамидова регьбервал гуда.

«Лезги газет»