РД-дин образованидин ва илимдин министерстводин пресс-къуллугъдин малуматралди, 2020-йисуз Дагъустандай Вирироссиядин школьникрин олимпиадайра кIвенкIвечи чкаяр кьурбуруз республикадин Гьукуматди пулдин пишкешар гудайвал я. Къарардал РД-дин премьер-министр Абдулпатах Амирханова къул чIугуна.
Къейд ийин хьи, 100 агъзур манатдин кьадарда авай пулдин пишкешар “Дагъустан Республикада образование вилик тухун” программадин сергьятра аваз чара ийидайвал я. Школьникрихъ галаз санал пишкешар абурун муаллимризни гузва.
2020-йисуз Дагъустандай пуд школьникдикай Вирироссиядин олимпиадайрин гъалибчияр хьана. Абурун арада алакьунар авай аялар патал кардик кутунвай республикадин многопрофильный лицей-интернатдин ученик Мегьамедхан Расулов (экологиядай), Махачкъала шегьердин 39-нумрадин лицейдин ученица Мария Короткова (биологиядай) ва Къизилюрт райондин Султанянгиюрт хуьруьн юкьван мектебдин ученица Гуьлбике Абитаева (технологиядай) ава.
Лагьана кIанда, уьлкведин дережада аваз кьиле физвай олимпиадаяр 24 предметдай тешкилзава ва абур школьникрин арада тухузвай виридалайни чIехи акъажунар яз гьисабзава.
«Лезги газет»
