Ван авуна
Зун “Лезги газетдин” 51-нумрада чапнавай Ш.Шихмурадован макъаладихъ галаз таниш хьана. Ана авторди Эседуллагь Мамедов рагьметдиз фейидалай инихъ 100 йис тамам хьанвайдакай ва а касдин тIвар хъсанвал чир жедай алай аямдин несилри чими келимайралди рикIел хкизвайдакай, ада вичин девирда авур кIвалахра алай несилдиз эбеди гел тунвайдакай гьахълудаказ малумарзава.
Ленинан ордендин сагьиб хьайи къанажагълу хцикай макъалада галай-галайвал кхьенва. Гьавиляй чун адан уьмуьрдин ва кIвалахдин рекьерикай гегьеншдиз рахадач. 1955-1961-йисара Эседуллагь Мамедов Ахцегь райондин райкомдин сад лагьай секретарь тир чIавуз зи рагьметлу дахди Ахцегь райондин Къучагърин хуьруьн “Искра” колхоздин седривиле кIвалахзавай. Ада гьамиша вичиз Ахцегь районда кIвалахай райкомдин секретаррикай Эседуллагь Мамедов хьтин михьи рикI авай, акьуллу камаллу, вичи кIвалахай вири районра халкьдин арада еке гьуьрмет хьайи мад гьич са секретарни вичиз акунач лугьудай. 1961-йис тир, ам секретарвиликай азадна, Обкомди Махачкъала шегьерда маса къуллугъдал тайинарнавай. Августдин вацран эхирар. И чIавуз хуьряй Ахцегьиз физвай чи дахдиз садлагьана Ахцегьрин гьамамрал алай аялрин санаторийдин патав текдиз акъвазнавай Эседуллагь Мамедов аквазва. Салам гана, ада жузуна:
— Эседуллагь Межидович, вун и экуьнин кьиляй вуч кIвалах аваз атанвайди я гьамамрал?
Хийир я, — лагьана Эседуллагь Мамедова. — Зун и санаторийда кIвалахзавай урус дишегьли Надядин патав атанвайди я. Кьве йис тир ада санаторийдин куьлуь гьайванрихъ галаз зи кьве гьайванни (кьве хеб) хуьзвай. Зун и хипер хутахиз атанвайди тир, анжах Надяди хипер куь колхоздин хиперин суьруьдик акатна лугьузвай.
И вахтунда дахди Эседуллагь Мамедоваз исятда за вав кьве хипен еринда, колхоздин суьруьдай кьуна, кьве гьер вахкуда, хипер ви куьз лазим я, лагьанай. И ван хьайи Эседуллагь Мамедова дахдиз гзаф сагърай лагьана, вичив и гьарам гьерер вахкудалди, хъсан тир а гьалалдин кьве хеб вахканайтIа лагьана. И гафарин ван хьайи дах аламат хьана, ада гьа юкъуз адан кьве хеб суьруьдикай хкана, вахкана. И суьгьбет зи дахдин рикIелай алат тийиз, са шумуд сеферда заз тикрар хъувунай. Эгер адан чкадал маса кас алайтIа, гьелбетда, ада кьве гьер вахчудай, лагьанай зи дахди.
Чи дахдини Эседуллагь Мамедов дуьз ва михьи къилихрин кас тирди субутзава. Ада алай вахтунин девирдин несилдиз инсанвилин, дуьзвилин чешне туна.
Ш.Шихмурадова вичин макъалада къейднавайвал, ихьтин михьи, лайихлу касдин тIвар эбеди авун патал ва адан 100 йис тамам хьунихъ галаз алакъалу яз, зи фикирдалди, адан тIварунихъ Мегьарамдхуьруьн, Докъузпара ва я Ахцегь районрин куьчейрикай сад янайтIа, гзаф хъсан ва гьахълу кар жедай. Ш.Шихмурадован теклифар дуьзбур ва гьахълубур я. За адан теклифрин тереф тамамвилелди хуьзва.
А.М.Агьмедагъаев,
хуьруьн майишатдин илимрин кандидат
