ЦIийи ктаб
Нариман Къарибован тIвар “Лезги газет” кIелзавайбуруз фадлай таниш я. Шаир, публицист, журналист, таржумачи тир ада хейлин йисара чи газетдин хсуси мухбир яз кIвалахнай. Алай вахтунда пенсияда аватIани, шаирди редакциядихъ галаз алакъаяр атIанвач, мукьвал-мукьвал къадим Дербент шегьердай чав макъалаяр, шиирар агакьарзава.
Нариман Къарибов са шумуд ктабдин авторни я. Мукьвара Дербент шегьерда “Экуьнин гъед” тIвар алаз шаирдин нубатдин ктаб чапдай акъатнава. Автордин цIийи ктаб кьве паюникай ибарат я: шииррикай ва публицистикадин эсеррикай. “Музейрин шегьер” тIвар ганвай паюна Дербентдин тарихдиз, къенин юкъуз талукь хейлин макъалаяр гьатнава. КIелзавай касдивай абурун куьмекдалди къадим шегьердикай хейлин делилар чириз жеда.
Нариман Къарибов аялар патални шиирар теснифзавай авторрикай сад я. Шаирдин цIийи ктабда гъвечIи кIелзавайбур патал кхьенвай эсеррини чка кьунва.
“Экуьнин гъед” Нариман Къарибован кIуьд лагьай ктаб я. Яратмишзавай гьар са кас патал ктаб акъатун кьетIен вакъиа я. Чна чи къелемдин чIехи стхадиз, “Лезги газетдин” вафалу амадагдиз и вакъиа мубаракзава ва чаз адахъ чандин сагъвал, яратмишунрин рекье мадни еке агалкьунар хьана кIанзава.
Агьмед Магьмудов
