Квез чидани?
Нидерландар лали (тюльпан) цуькверин ватан яз гьисабзава. Ана авай Кёкенхоф тIвар алай цуькверин паркуна гзаф кьадарда гатфарин цуьквер цазва. И паркуна гьар йисан апрелдиз, майдиз 7 миллион кьван лали цуьквер экъечIзава. Лалийри цуьк акъуддай вахтунда ана цуькверин фестивалар-мярекатарни тешкилзава.
Парк Лейден ва Харлем шегьеррин арада, гъвечIи Лиссе шегьердин мулкарал ала. Аниз фидай ихтиярар инсанриз гьар йисан тахминан 20-мартдилай 20-майдалди гузва.
Цуькверин паркунин умуми майданди 32 гектар кьунва. ЧIехи пай цуьквер лалияр ятIани, ана бязи маса цуькверни цазва. Паркунин сергьятра гзаф вирер, чарчарар, кIамар, яхцIурдалай гзаф гъвечIи муькъверни ава. Инсанар къекъуьн патал цуькверин юкьвара авай жигъиррин умуми яргъивал 15 километрдив агакьнава. Жигъиррин къерехар тирвал Нидерландрин ва къецепатан устадрин-тимталчийрин скульптураярни эцигнава. Идалайни гъейри, паркунин мулкара гзаф кьадарда жуьреба-жуьре тарар экъечIзава.
Паркунин ажайибвални кьетIенвал ана авай кIвалин гьайванрин фермайрини, шляпайрин, чайдин павильонрини, аялар машгъулардай комплексдини, кафейрини, ресторанрини артухарзава. Гьар йисан апрелдин эхирда ана цуькверин парадни кьиле тухузва.
«Лезги газет»
