Дагъустандин ушу-саньдадин федерацияди чи ватандаш, вичин ери-бине Мегьарамдхуьруьн райондин Гарагърин хуьряй тир ва алай вахтунда Каспийск шегьерда яшамиш жезвай Халид Сардароваз, йисан нетижайриз (спортдин 3 акъажунра къизилдин медалар къазанмишуниз) килигна, виридалайни хъсан спортсмен яз гьисабуналди, махсус Кубок гана…
Адет тирвал, 2020-йисан эвел кьиляй (24-26-январдиз) Каспийскда, Али Алиеван тIварунихъ галай спортдин ва жегьилрин Дворецда, ушу-саньдадай заланвилин 10 категориядай кьиле фейи Дагъустандин чемпионатда Халид Сардарова (70 кг-дин заланвал авайбурун арада) инанмишвилелди 1-чка кьуна. И агалкьунди чи ватандашдиз республикадин хкянавай командадик кваз уьлкведин дережадин чемпионатда иштиракдай мумкинвал гана. Мартдиз кьиле тухун пландик квай Россиядин чемпионат (адахъ галаз сад хьиз, жегьилрин арада уьлкведин кIвенкIвечивал патал акъажунарни) тIугъвалдихъ галаз алакъалу яз муламарай карантин себеб яз алай йисан саки эхирриз Владимир шегьерда кьиле тухвана. Дагъустандин хкянавай командади (тренер — Мегьамедали Мегьамедов) акьалтIай хъсан нетижаяр къазанмишна. ИкI, заланвилин 11 категориядикай 10 категорияда дагъустанвияр къизилдин медалриз лайихлу хьана. Абурун арада чи ватандаш Халид Сардаровни (70 кг) авай.
Алай йисуз Х.Сардарова къазанмишнавай са агалкьун мад ава: Россиядин ва Москва шегьердин ушудин федерацийри Елена ва Геннадий Тимченкойрин мергьяматлувилин фондунин куьмекни галаз февралдиз “Москвадин ушудин гъетер-2020” тIвар алаз кьиле тухвай международный турнирдани ада къизилдин медаль къазанмишна. Лугьун лазим я хьи, алай йисуз (ам гила 6 сеферда кьиле тухванва) и турнирда дуьньядин 19 уьлкведай (Германиядай, Испаниядай, Грециядай, Италиядай, Израилдай, Ирандай, Тунисдай, Египетдай ва мсб) тир 1000-далай виниз спортсменри чпин устадвал къалурна. Ушудай Европадин ва международный федерацийрин виридалайни хъсан судьяйри бягьсерин нетижаяр кьуна, виридалайни къуватлубур, бажарагълубур хкяна. Абурун жергеда чи ватанэгьлини хьунал, гьелбетда, чна дамахзава.
Лугьун лазим я хьи, хъсан нетижаяр чи ватандашди алатай йисарани къазанмишна. РикIел хкин: ада ушу-саньдадай Дагъустандин ва Россиядин чемпионатра, Дагъустандин ва Россиядин Кубокар патал акъажунра ва маса турниррани (абурун жергедай яз Юнус Гьуьсейнован тIварунихъ галай международный турнирдани) гъалибвилер къазанмишна. Халид Сардарова кунг-фудайни вичин къуватар ахтармишна. ИкI, 2018-йисуз ада и жуьредай Дагъустандин чемпионвилин тIварни къазанмишна.
Къуй чи ватандашдихъ спортда ва уьмуьрда мадни еке агалкьунар хьурай!
Рагнеда Рамалданова
