Алай вахтунда ачух рикIни гъил авай жумарт инсанри ийизвай хъсан крарикай, зи фикирдалди, абурулай амайбуруни чешне къачун патал виридаз чир хьун лазим я. Къе заз халкьдин патай еке гьуьрмет, баркалла къазанмишнавайбурукай сад тир чи ватандаш Мамед Абасовакай суьгьбетиз кIанзава.

Ам РФ-дин Госдумадин депутат тир чIавуз Вини Къурушрин хуь­руьз мугьман хьанай. Халкьди адавай же­гьилар спортдал машгъул хьун патал спортзал эцигунин карда куьмек тIалабнай. А вахтунда ада чи хуьруьн жемятдиз и кар гьукуматдин харжидалди ваъ, вичин хсуси­ такьатрихъ кьилиз акъудда лагьана хиве кьунай. Аферин ва баркалла вичиз! Гайи гаф а касди кьилизни акъудна. Гьа икI, кьакьан дагъдин хуьре М.Абасован такьатрихъ спортзал эцигна саки куьтягьнава, хъийидай­ са тIимил куьлуь-шуьлуь кIвала­хар ама. Гьаваяр мекьи хьуникди кIва­ла­хар явашдаказ вилик физватIани, спортзал­ 2021-йисуз ишлемишиз вахкун пландик ква. Умудлу я, спортзал ишлемишиз вахку­дай вахтуналди ам тадаракламишдай ксар­ни майдандиз акъатда. Къуй чахъ ихьтин ачух рикIни гъил авай, гайи гаф кьилиз акъуддай, халкьдин дердиникай хабар кьа­дай кьегьал рухваяр мадни гзаф хьурай!­

Гьайиф хьи, чпин кар гьалтайла жемятдиз еке крар хиве кьаз, амма гуьгъуьнлай гайи гаф кьилиз акъуд тавур ксарикай жуьреба-жуьре къуллугърин сагьибар жезва. Чпиз кIандай къуллугъ гъиле гьатнамазди ахьтинбурун рикIерилай вири алатзава. Дугъриданни, Мамед Абасов хьтин ксар кье­риз-цIаруз гьалтзава. Гьавиляй заз хуьруьн депутатривай ва администрациядин кьиливай ийидай са тIалабун ава: амни Мамед Абасоваз Къурушрин хуьруьн гьуьрметлу агьали лагьай тIвар гун я.

Шихали  Багъиров