2020-йисни мукьвара тарихда гьатда. “Лезги газетдин” редакциядин коллективди мад са йисуз галатун тийижиз санлай чи вири халкьдиз къуллугъна: чаз дуьньядин гьар са пипIе гьихьтин вакъиаяр кьиле фенатIа, газетдин чинилай хабар гана.
Гьикьван четинвилер ацалтзаватIани, газет вахтунихъ галаз кам-камуна аваз физ алахънава. Газетдилай, коллективдилай аслу тушиз адан къимет хкажзавайди, ам йисалай-суз багьа жезвайди аквазва. Амма зи рикI дарихарзавай кар масад я: чи халкьди — чи кьегьал рухвайрини рушари адан тираж агъуз аватуниз рехъ гун. Аквазвайвал, 2020-йисан кьвед лагьай пай патал газет кхьенвай ксарин кьадар саки 1500-дан тIимил хьана. Им чи халкьдин и кьадар векилри чпи чIалаз, медениятдиз, шииратдиз… ийизвай гьуьрмет квадарнавайвилин лишан я. Бедендиз чпикай еке зиян авай эрекьни, пIапIрусни чIугвазва бязибуру, абурухъ гузвай пул гьайиф къвезвач. Газет кхьиник чна чи пай кутун тавурла, адан, санлай къачурла чи чIалан, медениятдин пакадин югъ, кьадар-кьисмет гьихьтинди хьурай?!
“Лезги газетдин” 100 йисан юбилейдинди тир йисуз газетдин тираж аквадайвал хкаж хьуник умуд кутунвайди тир…
Гьуьрметлу лезги бубаяр ва дидеяр, стхаяр ва вахар, балаяр, куьне садра фикир це алай вахтунда дуьньяда гьихьтин гьалар арадал атанватIа, къвезватIа. Чи дидед чIалан къайгъударвал чна тавуртIа, чи Ватан чаз кIан тахьайтIа, гьихьтинди хьурай чи гележег?
Пис кIвалах яни чаз газетдин чинилай чи кьегьал рухвайрикайни рушарикай, чи халкьдин вилик-кьилик квай ксарикай, чи чIалан устадрикай, къени ва пис крарикай гьафтеда садра тамам хабарар агакьун? Бязибуру лугьузва: захъ интернет авазва, газет кхьин квез лазим я? Ава жеди, уьмуьр датIана вилик физва, алай аямда чаз галайвилер, къулайвилер, гьа гьисабдай яз, газетни интернетдай кIелдай мумкинвал ава. Амма газет компьютердин экрандилай кIелунни, хтулрихъ — чи акьалтзавай несилдихъ галаз санал жуван иштираквални аваз, са-са макъала фасагьатдаказ кIелун сад яни? Суалар гзаф жезва, амма жавабар чалай виридалай аслу я…
Эхирдай заз мадни лугьуз кIанзава: сагърай вич, кьиле Мегьамед Ибрагьимов авай “Лезги газетдин” коллектив! Зегьмет чIугу! Зегьмет чIугурла, гьар са затIуни бегьер гузвайди я. Квез газетдин 100 йисан юбилей мубарак хьурай! Квехъ еке агалкьунар, чандин сагъвал, коллективдин арадани гьуьрмет хьурай! Гьуьрметди берекат арадал гъизвайди я! Гьуьрметлу зи халкьдин гьар са векил, ша чна, вири сад хьана, фикирар сад авуна, жуван лезги чIалалди — дидед чIалалди — акъатзавай газет кхьиник пай кутан!
Шихали Багъиров
