Байденан сифте тапшуругъ
США-дин президентдин сечкийра гъалиб хьун патал бес кьадарда сесер хьайи Жозеф Байдена президентдин къуллугъдал вичин эвелимжи тапшуругъ вуч жедатIа, гьадакай ихтилатна. ИкI, сифте нубатда ам коронавирусдин тIугъвалдихъ галаз женг тухунал (вакцинайрал ва экономика гуьнгуьна хтунал) машгъул жеда. Идакай “Лента.ру” чешмеди хабар гузва.
“Ихтилат сиясатдикай ваъ, инсанар гьикI къутармишдатIа, гьадакай я”, — раижзава Байденан келимаяр чешмеди. Ада игьтияж авай америкавийриз пулдин куьмек гунин макьсадни вилик эцигнава.
Байдена уьлкведа кьиле фейи президентдин сечкияр адалатлубур яз гьисабзава.
Олимпиададиз акси я
Японвияр 2021-йисуз Токиода олимпиада кьиле тухуниз акси я. “NHK” каналди хабар гузвайвал, и гьакъиндай телефонрин куьмекдалди халкьдин фикирар чинунин серенжемдин нетижайри шагьидвалзава.
Кьилди къачуртIа, хабарар кьурбурукай 32 процентдиз Японияда олимпиада тухвана кIанзавач. Агьалийрин 31 процентди олимпиададин къугъунар мад сеферда маса вахтунал вегьин герек аваз гьисабзава. Анжах 27 процентди разивал къалурна.
Къейдзавайвал, уьлкведа коронавирус чукIунин гьалар къизгъин жезва. 2020-йисан гатун олимпиада 2021-йисал вегьин хъувурдакай алай йисан 24-мартдиз малумарнай.
Икьрардал амалзава
“Sputnik Армения” чешмеди хабар гузвайвал, Россиядин оборонадин министерстводин векил, генерал-майор И.Конашенкова Дагълух Къарабахда женгер акъвазарунин къайдадал амалзавайдакай малумарна.
“Дагълух Къарабахда ислягьвал хуьнин къаравулда акъвазнавай Россиядин векилрин дестеди суткада кьиляй-кьилиз гьалар ахтармишзава, икьрардалди меслятдал атанвай къайдадал амал авунин месэладал гуьзчивал тухузва”, — лагьана Конашенкова.
Къалмакъал хьайи зонада алай вахтунда ислягьвал хуьн патал 1960 россиявиди гуьзчивал тухузва.
Къарабахдин гьалар гуьзчивилик кутунватIани, 12-декабрдиз кьве терефдини сада муькуьдак тахсирар кутунай. Гуьгъуьнлай Эрменистандин оборонадин министерстводи Азербайжандин армия Къарабахдин кьиблепата гьужумдин цIийи гьерекатрив эгечIнава лагьанай.
Вакцина маса къачуна
Кеферпатан Кореяди Россиядивай коронавирусдиз акси “Спутник V” вакцина ва Китайдивай термографарни маса тадаракар маса къачуна. Икьрардин къиметдин ва вакцинайрин кьадар гьелелиг малум туш. Бязи чешмейрал асаслу яз, идакай “Лента.ру” сайтди хабар гана.
Зарарлу тушиз гьисабзава
“Роскачестводин” пешекар С.Кузьменкоди “Российская газета” чешмедиз ихтилатнавайвал, телефон яргъал вахтунда патав хьуни инсандин сагъламвилиз зарар гузвайдан гьакъиндай илимдал бинелу са делилни авач. Адан фикирдалди, гаджет жуван кроватдин патав эцигун зарарлу туш.
Кузьменкоди меслят къалурзавайвал, кроватдал къатканвайла, инсанди смартфондин экрандиз яргъалди килигун хъсан туш, вучиз лагьайтIа и карди вилерин экв зайифарун мумкин я. Идалайни гъейри, ахвар ийидалди вилик са сятдин къене телефон ишлемиш тавун хъсан яз гьисабзава.
“Дуствилелди яшамиш жен”
Белоруссиядин президент А.Лукашенкоди ватандашриз уьлкве хуьниз эвер гана, хабар гузва “БЕЛТА” чешмеди.
“Заз вирибур зи фикирдин гъавурда акьуна кIанзава, ам дегиш хьанвач: ша дуствилелди яшамиш жен, уьлкве хуьн”, — лагьана ада. Уьлкведа ватандашар ислягьвилелди, дуствилелди яшамиш хьунин месэла ада вичин кьилин везифа я лагьанва, амма вири месэлаяр ватандашри гьялда, гьабурулай аслу я. Лукашенкоди алава хъувурвал, вичи гьукум кьуна акъвазунизни майилвалзавач, амма уьлкве “вахкудай” фикирни авач.
Къейд ийин, Белоруссияда президентдин сечкияр хьайидалай инихъ наразивилин серенжемар кьиле физ кьуд варз я.
ВОЗ-дин малумат
Дуьньядин здравоохраненидин тешкилатдин делилралди, 7-декабрдилай 13-декабрдалди вири дуьньяда коронавирус акатай 4,3 миллиондилайни гзаф ксар дуьздал акъуднава, хабар гузва “Новости” РИА-ди.
ТIугъвал пайда хьайидалай кьулухъ гьафтедин муддатда икьван гзаф ксарик вирус акатай дуьшуьшар идалай вилик хьанач. ВОЗ-ди къейдзавайвал, гзафни-гзаф Америкадани Европада гьалар пис я.
Жонс Хопкинсан университетдин делилралди, тIугъвал пайда хьайидалай инихъ дуьньяда коронавирус акатайбурун умуми кьадар 74 миллиондиз мукьва жезва.
«Лезги газет»
