Мегьарамдхуьруьн райондин Киркарин хуьряй тир Сулейман Рамазанов муаллимвиле кIвалахун патал Рутул райондиз рекье твада. Чкадал ам Хъуьлуьдрин мектебда муаллим яз тайинарда. Таниш тушир хуьре адаз чидай касни авачир. Хъуьлуьда ам мугьманрал гзаф рикI алай Башир Маллаевал гьалтда. 1932-йисалай 1934-йисалди ам Башир халудин кIвале яшамиш хьана. Вири уьмуьрда абур арада еке гьуьрмет-хатур авай хванахваяр яз амукьна.
Хуьруьнвийрин патай еке гьуьрмет къазанмишай С.Рамазанов Рутул райондин руководстводи НКВД-дин начальник яз тайинарна. 1934-1945-йисара ада и къуллугъ кьиле тухвана. И йисара кIвалахдин рекье ада къалурай лайихлувилер фикирда кьуна, С.Рамазанов республикадин руководстводи Махачкъаладиз хкана, МВД-дин къурулушда жавабдар къуллугъ ихтибарна. Подполковникдин чинда аваз отставкадиз экъечIай ам меркезда амукьна, гьана рагьметдизни фена.
Чахъ авай делилралди, Сулейман Рамазанован уьмуьрдин юлдаш Людмила урус дишегьли тир. Ада духтур яз кIвалахна. Абурун хизанда кьве гада чIехи хьана. Гьайиф хьи, чахъ абурукай са делилни авач. Белки, газетдин чинилай чпин багърийрин тIварар акур рухвайри чпикайни чаз хабар гун…
Башир Маллаеван хва Абдусаламан чIехи руш ФатIимат Башировади (ам ингилис чIалан муаллим я) чав вичи багьа ядигар яз хуьзвай Сулейман Рамазанова вичин бубадиз кхьей “Ваз суварар мубарак хьуй, Абдусалам” тIвар алай шиир агакьарна ва ам “Лезги газетдиз” акъудун тIалабна.
Яни, киркави Сулейман Рамазанов неинки муаллим, къанун-къайда хуьдай органрин къуллугъчи, гьакIни Аллагьдин патай яратмишдай пай ганвай инсан тир. Газет кIелзавайбурун фикирдиз чна винидихъ тIвар кьур шиир гъизва:
Суварар я майдиз къведай,
Къведай йисуз мад хкведай,
Вири халкьдиз шадвал жедай
Ваз мубарак, Абдусалам!
Ваз ван хьанай халкьдин эвер,
Къазанмишиз гъалибвилер,
Вун дяведа хьайи тегьер
Чаз хабар я, Абдусалам!
Дяведин къаст кьилиз тухуз,
Фашистариз мумкин тагуз.
Аферин хьуй вирибуруз,
Гьа жергедай — Абдусалам!
Вун хьтинбур лап сейрек я,
Чеб тарихдиз лап герек я,
Чи Ватандин куьн дирек я,
Вун сагълугъ хьуй, Абдусалам!
Гила жув хуьх иердаказ,
Жуван лувак Майрамни кваз,
Фулфанд вацIун ятарни хъваз
Са кеф чIугу, Абдусалам!
(4-май, 1985-йис. Бубайрилай амай хванахва Сулейман)
С.-А. Абдурашидов,
Хъуьлуьдрин хуьр
