ЦIийи ктабар
“Тарни тIвар” тIвар алай ктаб цIинин йисуз лезги гьикаятдин алемдиз алава хъхьайбурукай сад я. Адан автор М.В.Ломоносован тIварунихъ галай университетда физикадинни математикадин факультет ва ана аспирантура куьтягьнавай илимрин кандидат, общественный деятель, карчи, лезги интеллигенциядин нуфузлу векил, Ахцегь райондин Чеперин хуьряй тир Мариф Жамединович Къадимов я.
Мариф Къадимов лезги кIелчийриз фадлай чизвай автор я. Алим ва писатель Къурбан Акимова 2015-йисуз чапдай акъудай “Лезги зарияр” ктабда адакай куьруь малумат ганва. Алимди къейднавайвал, М.Къадимован гьикаятдин гъвечIи эсерриз дерин фикирар, зарафат, хъвер хас я. И зенд чав агакьнавай ктабдини успатзава.
Къейд ийин, М.Къадимова “Тарни тIвар” ктабдихъ галаз санал урус чIалал “Жизни живые метки” ктабни чапдай акъуднава. Кьве ктабни асул гьисабдай урус ва лезги чIаларал кхьенвай гьа са эсеррикай ибарат я. Абур Махачкъалада, гьар садан тираж 300 экземпляр яз, автордин редакциядик кваз чапдай акъатнава. Ана ибретлу кьисаяр, уьмуьрда гьалтзавай ажайиб агьвалатрикай кхьенвай гьикаяяр гьатнава.
Эсеррин чIал кIелзавайди хъсандиз гъавурда акьадайди, художественный эдебиятдин стилдин кьетIенвилериз тамамвилелди жаваб гузвайди я.
“Авторди кIелзавай касдин фикир чи халкьдин гьар йикъан ацукьун-къарагъунал ва арада авай ихтибар, гьуьрмет мягькемардай крарал желбзава”, — кхьенва ктабдин метлебдикай ганвай куьруь малуматда.
Ктабрин сифте кьиле шаирар, писателар тир А.Къардаша, С.Саидгьасанова, Ф.Нагъиева ва масабуру автордин эсеррикай куьрелди лагьанвай фикиррини гьикаятчидин эсеррихъ тербия, насигьатар, акьулдин тарсар гунин рекьяй еке метлеб авайди субутзава.
Ктаб са шумуд разделдиз пайнава: “КьетIен къилихрин инсанар”, “Агьвалатар”, “Жамедин бубадин махар”, “Миниатюраяр”, “Руьгьдин сувар”, “Хуьруьн шикилар”.
Сад лагьай пай халкьдин арада гьуьрмет хьайи са шумуд касдикай кхьенвай итижлу макъалайрикай ибарат я. Муькуь паяра гьатнавай эсерар чаз уьмуьрдай аквазвай, ван жезвай крар, агьвалатар я.
Эхирдай “Халис инсан хьухь!” тIвар ганвай ачух тарсунин тамам план ганва. Ам авторди мергьяматлувилин “ЛЕКИ” фондунин векилрин теклифдалди туькIуьрнава.
ЦIийи ктабар гьар са лезгидиз теклифиз жедайбур я.
К.Ферзалиев
