Къурху кутазвай месэла яз аматIани, тIугъвалди ин­санар михьиз галатарнава, гьатта адан хаталувилин чIа­лахъ тежезвайбур исятдани ама. Амма тIугъ­валди инсаниятдин арада агъавалзавайвилин делил чпин бей­нида инкариз хьайи хейлинбуру коронавирус чпик акатайдалай кьулухъ гъалатI аннамишна. Ихьтин мисалар­ чавай  чи танишрин арадай кIамай кьван гъиз жеда. АкI аквазва хьи, гиманлувилера гьатнавай бязибуруз анжах­ ам чпик акатайдалай кьулухъ гьакъикъат тестикь жезва­.

ТIугъвал пайда хьайи, адахъ агалаз алакъалу яз бя­зи сергьятвилер эцигай сифте йикъара зун тажубарай, гьелелиг садавайни “кьил акъудиз” тахьанвай са кар къени давам жезва: шегьерра авай чIехи улакьра басабас инсанар жезва, маскаяр алукIзавайбурулай алукI тийизвайбур са шумуд сеферда пара я. Инал заз гатфарин вахтунда эцигай къадагъадин серенжем ри­кIел хкиз кIанзава. А чIавуз махсус ихтияр (документ) ава­чир ксариз чпин хсуси улакьра аваз санай масаниз фин къадагъа авунвай, шофердин патав ацукьнавай ксарни ахтармишзавай. Рекьера километррикай ибарат­ машинрин цIиргъинар арадал къвезвай. Лугьузвай хьи, ихтияр гузвай документ гвачтIа, общественный улакьда­ аваз вач… Инсанар сад садаз мукьва тахьунин, арада мензил хуьнин макьсаддалди кьабулнавай серенжемар яз хьайила, автобусар, троллейбусар кIвач эцигдай чка амукь тийидайвал инсанрай ацIузвайдакай гуя садазни хабар авачир. ЧIехи улакьда авайла, вал маска вучиз алач лугьудай касни жезвач. Кьезил улакьар хьиз, чIехи автобусар, троллейбусар постарал акъвазарни ийизвачир. Белки, са тIимил геж хьиз и аламатдин «агьвалатдай» кьил акъатуник за умуд кутунвай. Варцарни алатна, тIугъвалди цIийи кьилелай камарни йигинарнава, амма а «сир» ахъайдай кас, адакай кIелдай са чешме къени малум хьанач хьи, хьанач.

И йикъара федеральный дережадин чешмейри хъсан тушир хабарни малумарна. Дуьньядин бязи духтурри, пешекарри коронавирусдилайни бетер, гзаф кьадарда инсанар къирмишдай цIийи тIугъвал пайда хьун мумкин я лугьуз, инсаниятдик квай велвела къизгъинарзава.

ЦIинин мартдиз пайда хьайи тIугъвалдихъ галаз къе инсанар саки вердиш хьанва.  Хейлин пешекарри, вирусологри июлдиз ва я августдиз коронавирус михьиз терг жеда лагьай зендерни са бинени авачирбур хьана. Гьелелиг коронавирус инсанрилай вичин вилик пад тамамвилелди кьаз алакьзавачир акьалтIай фендигар шей яз амукьзава. Гьавиляй чна и месэла дикъетдикай хкудун эсиллагь дуьз туш.

К.Ферзалиев