“Лезги газетдиз” Дагъустандин Халкьдин Собранидин пресс-къуллугъди хабар гайивал, мукьвара Махачкъалада республикадин меркез дагълух 18 райондихъ галаз алакъалу ийизвай цIийи муьгъ ахъаюниз талукьарнавай мярекат кьиле фена.
“И муькъуьхъ Дагъларин уьлкведин агьалияр патал еке метлеб ава, гьикI лагьайтIа, ада меркез 18 райондихъ ва Буйнакск шегьердихъ галаз алакъалу ийизва. РД-дин Халкьдин Собранидиз дагъустанвийрилай цIийи муьгъ кардик кутунин игьтияж фадлай авайди тестикьарзавай чарар-цIарар гзаф атана. Къе и кар кьилиз акъатна. Гила дагъдин районрай Махачкъаладиз хатасуз цIийи муькъвяй физ-хквез жеда”, — лагьана Хизри Шихсаидова.
ЦIийи муьгъ Махачкъаладин кеферпата кардик акатнава ва ада меркездихъ галаз асул гьисабдай Дагъустандин кеферпата авай районар алакъалу ийизва. Къейд ийин хьи, муьгъ эцигунин кIвалахар 2018-йисуз гъиле кьунай. Адан яргъивилел — 100 метр, гьяркьуьвилелни 26 метр ала. Ада Махачкъаладиз кеферпатай гьахьзавай рекье улакьрин гьерекат манийвилер (пробкаяр) авачиз кардик хьуниз таъсирда.
«Лезги газет»
