Эхиримжи вахтара Сулейман-Стальский районда адалатлу кIвалахар гзаф кьиле физва. Месела, цIийи эцигунар гъиле кьунва, куьчейра къир цазва ва икI мад. Идахъ галаз сад хьиз, хуьрера татугай кIвалахарни авачиз туш.
Герейханован хуьр районда чIехи ва меденивал авай хуьрерикай сад я. Хуьруьн юкьвай Советское-Ташкапур шегьре рехъни физва. Алай вахтунда, федеральный программадин бинедаллаз, и шегьре хъсандиз туькIуьрнава: къир цанва, къерехрай яхдиз фидай рекьерни авунва, лазим чкайрал лишанарни эцигнава. Амма шегьре рекьин Ленинан куьчедин са паюна йифиз экв гудай дестекар авач, ирид куьчедин агьалияр экъечIзавай ва мектебдиз физвай аялар тухузвай чкадал транспорт гуьзлемишиз акъваздай пен (остановка) алач.
Виликрай ГАИ алай чкадал кьван рекьин къерехда эквер авайди тир. Гила 200-300 метрдин мензилда я дестекар акIур хъувунвач, я эквер авач.
Са шумуд йисарин вилик гуьзчивиликай хкуднавай, фикир тагузмай хуьруьн культурадин кIвал, агьалийриз ял ядай парк ремонтна куьтягьнава, азарханада ремонтдин кIвалахар кьиле тухузва.
Хуьруьн куьчейра авай экверин линиярни, бязи куьчейра куьгьне хьанвай дестекарни цIийибуралди эвезна, туькIуьр хъийизва, симер дегишарнава, трансформаторар цIийиз эцигнава. Гьа са вахтунда хуьруьн “Сухой поселокдин” агъа кьиле экверин месэла хцидаказ акъвазнаваз са шумуд йис я. Ана трансформатор дегишарна-ватIани, ам гъвечIиди хьун себеб яз, гужлувал бес жезвач. Адак акатзавай кIвалерин кьадар гзаф я. Юкъуз ва нянин вахтунда эквер лап зайиф жезва. Виридан кIвалера морозильникар, холодильникар, 1-2 телевизор, электричество ишлемишзавай маса техника, тадаракар ава. Холодильникри, телевизорри зайифдиз кIвалахзава, гужа гьатзава. Чара тахьайла, инсанар стабилизаторар къачуниз мажбур жезва. И кIвалахдин патахъай чна са шумудра абонентвилин къуллугъдин векилар хабардарнай, анин чIехи-даз чарни кхьенай чна.
Стабилизаторри къалурзавайвал, йикъан вахтара токдин гужлувал гзаф вахтара лап агъуз аватзава: 130, 140, 170 кВт-дал кьван. Бязи вахтара кьуланфериз ва экуьнахъ фад 200-далайни виниз акъатзава. И кар себеб яз, электротехника къайдадикай хкатзава. Ихьтин гьалар аваз са шумуд йис я. Месэла къайдадик кухтун патал жавабдар сагьибри серенжемар кьабулуник чна умуд кутазва.
Вадим Жамалдинов
