Чи ватанэгьлияр — гьар сана
Нубатдин ихтилат Ульяновскдин областда яшамиш жезвай, “УАЗ” заводдин участокдин начальниквиле кIвалахзавай, гьа са вахтунда а регионда “Дагъустандин халкьарин конгресс” жемиятдин тешкилатдин президент яз зегьмет чIугвазвай Жагьир Абдулгьамидович Гьафизовакай я.
Ам 1964-йисан 18-мартдиз дагълух Докъузпара райондин Мискискарин хуьре дидедиз хьана. Мектеб куьтягьайдалай кьулухъ Волгограддин политехнический институтда кIелна, “автомобилар ва автомобилрин майишат” пеше къачуна.
Кьилин образование къачур жегьил пешекарди 1982-йисуз вичин зегьметдин рехъ Волгограддин авторемзаводда слесарь-моторист яз кIвалахунилай башламишна. Пешедин рекьяй вичин алакьунар агалкьунралди синагъдай акъудай, герек тежриба кIватIай пешекар гуьгъуьнлай Волгоград шегьердин трамвайринни троллейбусрин крар идара ийидай трамвайдин паркунин цехдин начальниквилин къуллугъдал ракъурна.
1989-йисуз Ульяновскдин автомобилрин заводдиз устIарвиле рекье туна. Кар алакьдай пешекар хьунилай гъейри, вичихъ тешкилатчивилин алакьунарни аваз акурла, заводдин регьберди Жагьир Гьафизов участокдин начальниквиле тайинарна. Ина 30 йисуз ада чIугур зегьмет асул гьисабдай конвейердихъ галаз алакъалу я.
Ам производстводин рекьяй бажарагъ авай тешкилатчи, гележег хъсанарунин мумкинвилерикай азадвилелди фагьум-фикир ийидай регьбер я. Алай вахтунда Жагьир Абдулгьамидовичан регьбервилик кваз производстводин вини дережадин пешекарвал авайбуру кIвалахзава. Къуллугъчияр вири модификацийрин автомобилар маса гун патал ахъаюнин управленидиз вахкунал машгъул я. Дагъвиди вичин кIвалахда автомобилрин ери хкажунин, кIвалахдай чкаяр хъсанарунин месэлайриз кьетIен фикир гузва. Гьа са вахтунда вичин пешекарвилин дережани датIана хкажунал алахъзава. ИкI, вичин жавабдар кIвалахдиз кьецI тагана, ада “УАЗ” ООО-дин къуллугъчияр пешекарвилин рекьяй вилик тухудай отделда Япониядин системаяр кардик кутунин рекьяй чирвилер къачуна.
Гьар са кар дикъетдик кутунин къилихар хас тирвиляй адахъ рабочийрин ва регьберрин арада гьуьрметни нуфуз ава. Неинки вичин, гьакI масабурун ихтиярарни хуьз алакьзавай кас тирвиляй 2012-йисуз чи ватанэгьли Ульяновскдин обласдин губернатордин патав гвай миллетрин алакъайрин рекьяй Советдин членвиле хкяна.
2012-йисан июлдилай Жагьир Гьафизов Ульяновскдин региондин “Дагъустандин халкьарин конгресс” жемиятдин тешкилатдин президент я. Тешкилатдин кIвалах Ульяновскдин областда администрациядин къурулушрихъ галаз регионда авай чи ватанэгьлийриз талукь месэлаяр саналди гьялуникай ибарат я. Дагъустандин патай векил яз, Ж.Гьафизова Ульяновскдин областда кьиле физвай вири мярекатра иштиракзава.
Зегьметдинни уьмуьрдин еке тежриба авай ватанэгьли уьлкведин сергьятра исятда вичи кIвалахзавай къуллугъдилайни чIехи, жавабдар, регьбервилин везифаяр кьиле тухуз алакьдай пешекар я.
Ж.Гьафизован вини дережадин пешекарвал, зегьметдин гьакъисагъвал адаз ганвай жуьреба-жуьре шабагьри, лайихлу тIварари успатзава: “УАЗ” ОАО-дин зегьметдин ветеран”, “Производстводин лап хъсан къуллугъчи”, “УАЗ” ОАО-дин лап хъсан устIар”, РФ-дин промышленностдинни алишверишдин министерстводин патай гьуьрметдин грамота ва икI мад…
Ж.Гьафизован хизанда пуд веледдиз тербия гузва. Кьисметди хайи чиливай яргъаз акъуднавай гьар са ватанэгьлидихъ чеб авай чкайра агалкьунар, хушбахтвилер хьурай.
К.Ферзалиев
