27-ноябрдиз Мегьарамдхуьруьн райондин Билбилхуьруьн юкьван мектебда, Вирироссиядин “Классные встречи” проектдин сергьятра аваз, лезги медениятдин ва эдебиятдин векилрихъ галаз гуьруьш кьиле фена.
Мярекатда “РД-дин лайихлу муаллим”, “Россиядин лап хъсан муаллим” тIварарин, РФ-дин Президентдин грантдин сагьиб, Россиядин писателрин союздин член, шаир Гъулангерек Ибрагьимовади, шаир, Россиядин писателрин союздин член, Дагъустандин писателрин союздин лезги секциядин регьбер, милли чIалал акъатзавай “Вахтар ва инсанар” передача кьиле тухузвай Владик Батманова, “РД-дин искусствойрин лайихлу деятель”, композитор, журналист Къагьриман Ибрагьимова, Билбилхуьруьн-Къазмайрин М.Абдуллаеван тIварунихъ галай юкьван мектебдин директор Тимур Саидова, тербия гунин рекьяй директордин заместитель Заидин Буржумова, школадин вожатый Сафинат Бейбалаевади, дидед чlалал, эдебиятдал рикl алай муаллимри ва аялри иштиракна.
Гуьруьш кьиляй-кьилиз къецепатан чlаларин муаллим, чIехи шаир Алирза Саидован руш Эмина Саидовади устаддаказ тухвана. Анал аялри кlватl хьанвайбуруз атанвай мугьманрин уьмуьрдин ва яратмишунрин рекьикай куьрелди суьгьбетна. Са сятни зура давам хьайи гуьруьш гзаф таъсирлудаказ кьиле фена. Мярекатдин сценарий муаллимди жуьреба-жуьре риваятралди, суьгьбетралди, аялри хуралай устаддиз кlелай Гъулангерек Ибрагьимовадин шиирралди, тамамарай Къагьриман Ибрагьимован манийралди, кружокдин иштиракчийри авур лезги кьуьлералди чlагурнавай.
Оксана Гъаниевади, Ума Абдуллаевади, Маида Рамазановади, Амрина Гуьлметовади, Аида Гьабибовади, Эльвира Акимовади, Мегьамед Саруханова, Алихан Жабраилова, Рудик Оганяна, Къизханум Туьменовади, Диана Гьуьсейнхановади, Зара ва Изольда Мацаевайри, Диана Абасовади, Играм Таибова устаддаказ кIелай шиирри мярекатдин иштиракчийрин гуьгьуьлар ачухна ва школада кIелзавай аялриз неинки дерин чирвилер гунин, гьакIни абурун бажарагъ ачухарунин, гьевесламишунин терефриз кьетIен фикир гузвайди тестикьарна.
Гуьгъуьнлай мярекатдал вичин ери-бине и хуьряй тир Гъулангерек Ибрагьимова рахана. “Гьар са касдин рикl хайи чилел, хайи дидедин чlалал хьун чарасуз я. Икl хьун паталди, эвелни-эвел кlвале диде-бубади тербия гун лазим я. Дуьньядал алай хейлин чlалар алай вахтунда квахьунин къурхулувилик ква. Чlал квахьунихъ галаз халкьарни квахьзава, абур дуьньядал аламачирдай гьисабзава. Гьар са касдин рикl вичин чlалал, халкьдал, чилел хьунин карда виридалайни еке пай сифте тарс гузвай муаллимди кутазва. Кlвалер мягькембур хьана кlанзаватlа, бинени мягькемди хьана кlанда. Сад лагьай муаллимдин зегьмет — им аялдин зигьиндин бине я. Гила за квез, аялар, за зи сифте муаллим хьайи Абдуллаева Умужагьан Исламовнадиз бахшнавай “Ахвар” шиир кlелда”, — лагьана ада.
В.Батманова ва Къ.Ибрагьимова аялриз чlал кlан хьунин, хайи литературадал ва милли искусстводал рикl хьунин насигьатар гана. Владик Батманова вичин шиирар кlелна ва, Гъулангерек Ибрагьимова Россиядин писателрин союздин членвилиз кьабулнавайдакай шад хабар гуналди, адав билет вахкана ва мубаракна.
Ахпа Тимур Саидова ва мугьманри мярекатда активнидаказ иштиракай аялриз, хъсандиз гуьруьш тешкилай Бейбалаева Сафинатаз, ам кьиле тухвай Эмина Саидовадиз, милли кьуьлер гьазурай Абдуразакьова Таватаз, музыкант Саруев Сарубегаз рикlин сидкьидай сагърай лагьана.
Эхирдай Гъ.Ибрагьимовади мярекатда иштиракай аялриз, муаллимриз, школадин библиотекадиз пишкеш яз вичин ктабар гана, ахпа вирида санал рикlел аламукьдай шикил яна.
Са шакни алач, ихьтин метлеблу гуьруьшри аялриз дидедин чlал кlанарда ва гьар са мярекатда абуру мадни еке гьевесдивди иштиракда.
Къагьриман Ибрагьимов
