И йикъара Белиж поселокдин кьил Рамиз Гьабибулаеван призар патал 14-17 йисара авай жаванрин командайрин арада Чlехи Гъалибвилин 72 йисаз бахшна футболдай турнир кьиле фена. Ана Белиждин, Лукlарин ва Нуьгдидин 7 командади иштиракна.
Мярекат Белиж поселокдин депутатрин собранидин председатель А.Сефербегова ачухна, анал Р.Гьабибулаев, поселокдин депутат А.Закарьяев, и цlарарин автор, ДЮСШ-дин директор М.Къазиев ва масабур рахана.
Футболдай акъажунрин кьилин судья З.Гьажиханов тир. 1-чкадиз ва гъиляй-гъилиз къведай кубокдиз Белиж поселокдин 2-нумрадин школадин команда лайихлу хьана. Лукlарин ва Белиж поселокдин 4-нумрадин школайрин командайри талукь тирвал, 2 ва 3-чкаяр кьуна.
Командайриз, кьунвай чкайриз килигна, къизилдин, гимишдин ва буьруьнждин медалар, тупарни грамотаяр, кьилин судьядиз къиметлу пишкеш ва грамота гана.
