Вичин ери-бине Мегьарамдхуьруьн райондин Чахчарин хуьр тир Гьажидауд Гьасановахъ галаз чи кIелчияр фадлай таниш я. Алай вахтунда ДГТУ-дин прикладной информатикадин ва юриспруденциядин факультетдин 5-курсуна заочно кIелзавай ам спортдал вичин 10 йис тамам хьайидалай инихъ машгъул жезва. Спортдин са шумуд жуьредай: ушу-саньдадай, кунгфудай, женгинин самбодай, ММА-дай… ада къазанмишай агалкьунрикай чна виликдайни хабарар ганай. Са тIимил йикъар идалай вилик Гьажидауда чун мад шадарна: Санкт-Петербург шегьерда кунгфудай кьиле фейи Россиядин чемпионатда ада 75 кг-дал къведалди заланвал авайбурун арада 1-чка кьуна. Россиядин чемпионвилин тIвар ва алай йисан августдиз Америкадин Нью-Йоркда кьиле фидай дуьньядин чемпионатда иштиракдай мумкинвал къазанмишна…
РикIел хкин: Гь.Гьасанов ММА-дай Европадин чемпионвилин (2014-йис, Италиядин Ливорно шегьер), гъилералди кукIунай кьве сеферда, ММА-дай Россиядин чемпионвилин тIвараризни лайихлу хьанай.
Гьажидаудан суьгьбетдай малум хьайивал, Россиядин чемпионатда (Дагъустандин хкянавай командадик кваз 30 спортсменди иштиракна) ада кьве бягьс кьиле тухвана, финалда — Москвадин патай экъечIнавай дагъустанви Ш.Абдулжалиловахъ галаз вичин къуватар ахтармишна. Бамишардай къайдадикай менфят къачур Гь.Гьасанова инанмишвилелди гъалибвал къазанмишна. Алай вахтунда Гьажидауда тренерар тир Эльдар Гьасанован ва Эседуллагь Эмирагъаеван гъилик вердишвилер къачузва. Гележегдин планрик лагьайтIа, вичин къуватар пешекарвилин рингда ахтармишун ква.
Къейд авун лазим я хьи, Гьажидаудаз спорт кIанарайди адан кьве стха — Эльдар ва Жавид Гьасановар я. Машгьур спортсменар тир абур спортдивай гилани къерех хьанвач. ИкI, Эльдар Гьасанова (ам Дербентда кардик квай “Альянс-файтер” спортклубдин директор я) Дагъустандин МВД-дин патай акъажунра алай вахтундани иштиракзава, агалкьунарни къазанмишзава. Кьилди къачуртIа, алатай йисуз ам женгинин самбодай чи уьлкведин махсус къуллугърин арада кьиле тухвай Россиядин чемпионатда, какахьай единоборствойрай генерал Трошинан турнирда 1-чкайриз лайихлу хьана.
2012-йисуз ушу-саньдадай дуьньядин чемпионатдин буьруьнждин призёр, гъилералди кукIунай Россиядин чемпион Жавид Гьасанова Дербентда суддин приставра кIвалахзава, ам “Альянс-файтер” спортклубда тренерни я.
Суьгьбетдин эхирдай Гьажидауда кьилди вичин ва вири хизандин тIварунихъай (буба-Азиз Гьасанова ДГТУ-да учебно-производственный мастерсткойдин заведующийвиле, диде — Фаимат Гьасановади Махачкъалада, МПБ-дин кардиологиядин отделенида медсестра яз кIвалахзава) вичиз акъажунриз фидайла куьмекар гузвай ксариз чухсагъул лугьун тIалабна. Ингье а ксар: меценат, чи гзаф спортсменриз датIана куьмекар гузвай кьегьал хва Азиз Яралиев, карчи Эдгард Адамов, Мегьарамдхуьруьн райондин кьил Фарид Агьмедов, ДГТУ-дин заочный факультетдин декан Надир Санаев, ДГТУ-дин ректордин куьмекчи Сахавидин Агъабалиев, ДГТУ-дин кафедрадин заведующийдин заместитель Фатима Муслимова.
Чи мурад Гь.Гьасанов Нью-Йоркдайни гъалибвал къазанмишна хтун, ада спортдин виридалайни кьакьан кукIушар муьтIуьгъарун я.
Рагнеда Рамалданова
