12-майдиз Кьурагь районда авай Россиядин халкьарин адетдин культурадин Центрадин регьбер, бажарагълу манидар, артистка Кевсер Жавидовна Фейзуллаевадин 60 йисан ва адан яратмишунрин рекьин 40 йисан юбилеяр къейдна.
Кевсер Фейзуллаевадиз тебрикар гваз Махачкъаладай, Дербентдай, Кьасумхуьрелай, Мегьарамдхуьруьн райондай, Белиждай хейлин мугьманар атанвай.
Машгьур тамада, манидар Ярагьмед Ярагьмедовани шаир Дильмира Ашурбеговади юбилярдин тlварцIихъ хуш келимаяр лагьуналди, межлис ачухунин гаф райондин кьилин заместитель Махач Хариеваз гана. Ада К.Фейзуллаевадиз вичин ва райондин кьил Замир Азизован патай юбилеяр тебрикна.
— Райондин культурадин хиле хъсан патахъ дегишвилер хьун патал К.Фейзуллаевади еке чалишмишвилер ийизва. Ада культурадин гьар са мярекат вини дережада аваз кьиле тухузва. Вичел тапшурмишай гьи кlвалах хьайитlани тарифлудаказ кьилиз акъудзава, — лагьана М.Хариева.
“Кевсер вах бажарагълу хизандай акъатнавай, культурадиз къуллугъ ийиз, диде-бубадин ирс давамарзавай, викlегь, инсанриз шадвал гузвай кас я”, — къейдна Кьурагьрин хуьруьн кавха Сейфедин Къурбанова.
Кевсеран рагьметлу диде Абидат Назаралиевади тамамарзавай “Телли” манидихъ яб акалайдалай кьулухъ, Лезгийрин СтIал Сулейманан тIварунихъ галай госмуздрамтеатрдин кьилин режиссер, РД-дин халкьдин артист М.Мирзабегова юбилярдин дидени буба рикIел хкана: “Рагьметлу Абидат вахни Жавид стха лайихлу гьуьрмет къазанмишнавай, искусстводин хиле зегьмет чIугвазвай ксар тир. Лезги культурада чlехи гел тур диде-бубадин, багърийрин рехъ къе Кевсера лайихлудаказ давамарзава. Адан руш Фатимани лезги театрдин актриса я. Бубайрин ирс давамарзавай куь хизан сагърай!”
Дагъустандин халкьдин артистка Зарифа Къухмазовади ва Дагъустандин культурадин лайихлу работник Ярагьмед Ярагьмедова Кевсер вахахъ галаз Тифлисдин театральный институтда кlелай йисар рикlел хкана. Зарифа Къухмазовади чпи гьа йисара рикl алаз лугьуз хьайи “Фатима” мани еке ашкъидалди тамамарна.
Сегьнедиз хкаж жез, юбилярдин тIварцIихъ тебрикдин хуш келимаяр и цlарарин авторди, шаир Сажидин Саидгьасанова, “Дагъустан” РГВК-дин художественный программайрин руководитель Гуьлера Камиловади, манидарар Даниял Къазиева, ашукь Айдына, жегьил шаир Гульфия Пиругълановади, ФЛНКА-дин Махачкъалада авай векил Пакизат Рагьимхановади ва масабуру лагьана.
Гуьгъуьнлай К. Фейзуллаевади и мярекат гурлудаказ кьиле финик пай кутунай вичин ярар-дустариз, багьа мугьманриз сагърай лагьана. Межлис юбилярдин сагълугъдай къурмишнавай дадлу хуьрекар алай суфрайрихъ давам хьана.
Къагьриман Ибрагьимов
