Чи ватанэгьлияр — гьар сана
КIелунра, кIвалахра, яратмишунра чи жегьилри къазанмишзавай агалкьунрикай чав мукьвал-мукьвал хабарар агакьзава. Ингье нубатдин муштулух Москвадай атана: лезги руш Лавияди МГУ яру дипломдалди куьтягьнава, гила ам аспирантурадик экечIнава.
Лавия Феликсовна Давудова 1996-йисан 21-сентябрдиз Махачкъалада военный къуллугъчидин ва математикрин несилрин хизанда дидедиз хьана. Адан буба Феликс Омарович, отставкада авай къенепатан къуллугъдин майор, Хив райондин Асахуьряй я, Сулейман-Стальский райондин Зугьрабахуьряй тир диде Эльмира Сарухановнади Москвадин областда Россиядин УФНС-дин къурулушда кIвалахзава.
Лавияди Махачкъаладин 8-нумрадин лицей тафаватлудаказ акьалтIарна. Лицейда кIелдай вахтунда ада республикадин дережада математикадай, физикадай, химиядай ва маса предметрай олимпиадайра иштиракна, хъсан чкаяр кьуна. 11-классда кIелзавай вахтунда ада Дагъустандин мектебрин арада математикадай кьиле фейи ачух “Пифагор” олимпиададани, МФТИ-дин физикадинни математикадин 53 лагьай олимпиададани 1-чкаяр кьуна.
Лавиядиз математика кIанарайди адан чIехи буба, советрин машгьур математик И.П.Натансонан ученик, вичин вири уьмуьр математикадиз бахш авур Сарухан Агъаханович Агъаханов я. Гаф кватай чкадал къейд тавуна жедач, Сарухан Агъахановичан алакьунар себеб яз, неинки республикада, гьакI адалай къецени математикадин илимрин рекьяй хейлинбуру кандидатвилин диссертацияр хвена.
ЧIехи бубадилай чешне къачуна, математик хьунин гьевес Лавиядик гьеле 5-классда авайла акатна. Сифте яз ада, 5-классда авайла, олимпиадада гъалибвал къачуна. “Вакай лап къуватлу математик жеда”, — лагьанай хтулдин сад лагьай гъалибвиликай хабар хьайи чIехи бубади.
Мектеб куьтягьайдалай кьулухъ Лавияди Москвадин са шумуд вуздиз документар ракъурна, виринрик агалкьунралди экечIни авуна. Амма гележегдин чIехи математик хьунин алакьунар авай руша лап хъсан математикар гьазурзавай М.В.Ломоносован тIварунихъ галай МГУ хкяна. Уьлкведин машгьур вузда кIелдай вахтундани ада вич лап хъсан студентка тирди тестикьарна.
Къейд ийин, 2016-2017-йисара мергьяматлувилин “ЛЕКИ” фондуни Лавиядиз гьар вацра стипендияни тайинарна.
2019-йисуз студентрин, аспирантрин ва жегьил алимрин Международный ХХVI “Ломоносов” конференциядал “Математика ва механика” хиляй “Исследование уравнения Матье вблизи границ второй резонансной зоны” темадай лап хъсан доклад авунай Лавиядиз грамота гана.
Алай йисуз Лавияди МГУ-дин механикадинни математикадин факультет яру дипломдалди акьалтIарнава. Гьелбетда, илимдин рекье чIехи кукIушрихъ агакьунин мурад рикIе авай жегьил математикди вичи кIелай вузда математикадин рекьяй мадни дерин чирвилер къачун кьетIнава. Алай вахтунда ада вуздин аспирантурада кIелун давамарзава.
Вилик еке макьсадар эцигнавай, дерин кьатIунар, бажарагъ авай Лавия Давудовадилай илимдин вини дережаяр муьтIуьгъариз алакьда. Къуй адахъ гележегда еке агалкьунар хьурай!
К.Ферзалиев
