Эминхуьруьн библиотекада Россиядин Игит Зейнудин Батманован экуь къамат рикIел хкуниз талукьарнавай мярекат кьиле тухвана. Библиотекадин заведующий Алла Буржалиевади Зейнудин Батманован уьмуьрдин ва зегьметдин рекьикай, игитвиликай гегьенш рахунар авуна.

— 2015-йисан 15-майдиз Кьурагь райондин КIирийрин хуьряй тир мешебеги Зейнудин Батманова, бандитрикай жегьил хизан азад ийиз туна, абурун чкадал вич залуквиле вугана. Абуру Зейнудиназ Кьурагь райондин ОВД-дин начальник полициядин нарядни галаз атун патал зенг авунин буйругъ гана. Амма  уьтквем хва Зейнудина ихьтин жаваб гана: “Зун ахпа инсанрин чиниз гьикI килиг хъийида? ГьакI хьайила, заз гуьлле це!”

Мешебегиди, вичин чандилай гъил къачуна, маса инсанар хвена. 2018-йисуз Зейнудин Батмановаз РФ-дин Президентдин Указдалди “Россиядин Игит” лагьай тIвар гана.

Россиядин Игит Зейнудин Батмановакай, адан игитвиликай мярекатдал рахай Эминхуьруьн юкьван школадин сифтегьан классрин муаллимар тир Гуьлхалум Наврузовади ва Жейран Мирзоевадини лагьана. Школьникри Зейнудин Батмановаз бахшна кхьенвай, гьакIни терроризм ва экстремизм негьзавай шиирар кIелна.

Хазран  Кьасумов