Виридуьньядин здравоохраненидин тешкилатди (ВОЗ) малумарнавайвал, вакцинайривай коронавирусдин азар чукIунин вилик пад тамамдиз кьаз жедач. ВОЗ-дин векил Х.Клюгедин ихтилат “Новости” РИА-ди раижна.

“Вакцинайри СОVID-19 тамамдаказ акъвазардачтIани, абуру тIугъвалдихъ галаз чIугвазвай женгина еке куьмек гузва”, — лагьа­на ада. Ада къейд авурвал, фармацевтикадин туькIуьрунри ва медицинадиз талукь жуьреба-жуьре технологийри инсанрин вилик цIийи мумкинвилер ачухзава.

Коронавирус акатзавайбурун кьадар эхиримжи йикъара дуьньядин хейлин уьлквейра, гьа жергедай яз Россиядани, къвердавай артух жезва.

25-ноябрдин делилралди, дуьньяда коронавирус акатайбурун кьадар 60 миллиондилайни алатнава. Россияда коронавирус акатнавайбурун кьадар 2 миллионни 100 агъзурдалай артух хьанва. Эхиримжи са шумуд юкъуз чи уьлкведа коронавирус акатнавай 20 агъзурдалайни виниз ксар дуьздал акъуднава. Пешекарри тестикьарзавайвал, гзафбуру тIугъвалдиз акси серенжемар вилив хуьн тийизвайвиляй начагъ жезвайбурун кьадар артух жезва.

Гьукум Байденав вахкуда

США-дин федеральный гьукумдарри цIийиз хкянавай президент Жозеф Байденав гьукум вахкуз гьазур тирдакай малумарнава, хабар гузва «CNN чешмеди.

7-ноябрдиз кьиле фейи сечкийра Байден гъалиб хьана. Амма са жерге штатра вич гъалиб хьанвайди яз гьисабзавай Трампа суддин куьмекдалди вичин кIвенкIвечивал арадал хкуник умуд кутунвай.

Банкунин карта гьикI хуьда? 

Информациядин сиясатдин, технологиядин ва алакъадин ­рекьяй Госдумадин комитетдин председателдин заместитель А.Свин­цова “Говорит Москва” радиодиз интервью гайи вахтунда банкунин карта лутуйрикай хуьдай къайда малумарна.

Свинцова россиявийриз агъа кIан 2-3 карта кардик кутун теклифзава: сад — анжах мажиб патал, кьвед лагьайди — са затI къачун патал кIватIзавай пул хуьн патал. Пуд лагьай картадикай интернетдин куьмекдалди яшайишда герек къведай куьлуь-шуьлуь затIар маса къачудайла, менфят къачуз жеда. Пешекарди интернетдай затIар къачун патал тайинарнавай картада 2-3 йикъан­ къене герек къведай кьван пулдин кьадар хуьн теклифзава.

США-дик тахсир кутуна

Китайдин гьукумдаррин фикирдалди, США-ди чпиз менфят хку­дунин макьсадралди алаш-булаш гьалар арадал гъизва. Ида­кай­ Филиппинра авай Пекиндин векилханадин малуматра къейднава.

“Лента.ру” чешмеди хабар гузвайвал, Китайдин дипломатрин арза островдин уьлкведиз милли хатасузвилин рекьяй США-дин меслятчи Роберт О,Брайен атунихъ галаз алакъалу я. Абурун фикирдалди, О,Брайен Китайдинни Филиппинрин арада къал тваз алахъзавай. Адалайни гъейри, ам Китайдин къенепатан месэлайрик къаришмиш жезвай.

Отставкадиз экъечIна

Эрменистандин премьер-министр Н. Пашинянан гьукуматдин чIехи пай — 12 министрдикай ругуд — отставкадиз экъечIна. Идакай “Интерфакс” чешмеди хабар гузва.

Къецепатан крарин, оборонадин, МЧС-дин, зегьметдинни яшайишдин месэлайрин, образованидин, илимдин, культурадин, экономикадин министрри къуллугъдилай элячIунин арзаяр кхьена.

9-ноябрдиз Эрменистанди, Азербайжанди ва Россияди Къарабахда дяве акъвазарунин гьакъиндай умуми икьрардал къулар эцигна. Документдал асаслу яз,  эрменийринни азербайжанрин терефар чпи кьунвай чкайрал аламукьзава.

Арадал атай нетижаяр Азербайжанди чпин гъалибвал яз кьабулнава. Эрменистанда халкьдин гегьенш къатари Пашинян кIва­лахдивай къерех хьун истемишунихъ галаз алакъалу чалпачух гьалар арадал атанва.

Какаодикай авай менфят

Великобританиядин ва США-дин университетрин алимри тес­тикьарзавайвал, какаодик квай флаванолри инсанрин мефтIедин кIвалах хъсанарда. Алимрин ахтармишунин нетижайрикай “Scientific Reports” журналда чапнавай макъалада хабар гузва.

Адалайни гъейри, какаодик квай менфятлу затIари дамаррин кьезил азарар сагъар хъувурдалай кьулухъ сагъламвал фад-фад  гуьнгуьна хутада.

Кускафтарри тIуьна

Зимбабведин Чируманзу районда кускафтаррин (гиена) нехир­ди кIвале ксанвай агьил инсандал гьужумна ва ам тIуьна. Идакай “CNN” чешмеди хабар гана.

Вагьшийри гьужумай вахтунда 87 йисан яшда авай Масека ви­чин къазмада текдаказ ксанвай. Кускафтарри ам кIваливай 300 метрдин мензилдиз ялна. Тамун къуллугъчияр хаталу вагьшийрин гуьгъуьна гьатнава. Абуру чкадин агьалийриз йифен чIавуз куьчедиз экъечI тавун, мукъаят хьун, кIвалерин ракIарар, дакIарар агалун теклифзава.

«Лезги газет»