“Дагъустан” РИА-ди хабар гузвайвал, алай вахтунда республикадин духтурханайра коронавирус акатнавай азарлуяр патал 3 246 чарпай (койка) кардик кутунва. РД-дин здравоохраненидин министерстводи 23-ноябрдиз раиж авур делилралди, духтурханайра коронавирус акатнавай 2 373 кас сагъар хъийизва. Абурун арада сагъламвал акьалтIай пис гьалда авайбурни ава.
Коронавирус акатнавайбур патал кардик кутунвай чарпайрин пудай са пай азад я. Дагъустандин здравоохраненидин министерстводин пресс-къуллугъди хабар гузвайвал, игьтияж аваз хьайитIа, чарпайрин кьадар мадни гзафарда.
“ТIугъвал акатнавайбурукай гзафбур (кьезил гьалда авайбур) кIвалин шартIара сагъар хъийизва. Духтурханайра къатканвайбурукай 80 процент азарлубурун гьал юкьван жуьрединди я, 2 процент — пис гьалда авайбур. Ахьтинбур реанимациядин шартIара сагъар хъийизва”, — алава хъувуна региондин здравоохраненидин министерстводин пресс-къуллугъдин векилди.
«Лезги газет»
