“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, 17-ноябрдиз Сергей Меликова Дагъустандин вузрин ректоррихъ галаз гуьруьш кьиле тухвана. Мярекатдин сергьятра аваз республикада кьилин образованидин къурулуш авай гьал веревирдна ва университетар акьалтIарзавай жегьил пешекарар кIвалахдалди таъминаруниз талукь месэлайриз килигна.
Республикадин Кьилин везифаяр вахтуналди тамамарзавай Сергей Меликова къейд авурвал, кьилин образованидин къурулушди яшайишдин жуьреба-жуьре хилера тамамарзавай проектрин еридиз, нетижайриз таъсирзава. Республикада алай вахтунда государстводин 6 вуз кардик ква. Абурукай гьар садахъ гьам чирвилер гунин, гьамни технологийрин рекьяй хъсан базаяр ва бес кьадар пешекарар ава.
Сергей Меликован гафаралди, туризмдин, хуьруьн майишатдин, промышленностдин ва маса хилериз инвестицияр желб авунихъ галаз санал и месэладиз вузрани кьетIен фикир гана кIанда.
РД-дин образованидин ва илимдин министр Уммупазиль Омаровади хабар гайивал, къенин юкъуз республикада авай государстводин 6 вузда, санлай къачурла, 54 агъзурдав агакьна студентри кIелзава, абурун чIехи паюни — бюджетдин такьатралди.
ДГУ-дин ректор Муртазали Рабаданова республикадин кьилин образованидин къурулуш авай гьалдикай гегьеншдиз суьгьбетна ва и карда Дагъустандихъ авай рекъемар уьлквединбурухъ галаз гекъигна. Ада образованидин къурулуш вилик тухун патал са жерге теклифарни гана.
Гуьруьшдикай гегьеншдиз РД-дин Кьилин сайтдай кIелиз жеда.
Чи мухбир
