Чи ватандашри республикада ва адалай къецени намуслудаказ кIвалахун, идалди чпин хайи ерияр машгьурун, гьелбетда, рикIик шадвал кутадай, чи халкьдин руьгь хкажзавай крар я. Россиядин шегьерра спортдин рекьяй агалкьунар къазанмишзавай кьегьал рухвайрикай газетдин гьар са нумрада чна шад хабарар гузва. Ахьтин кьегьалар чIехи авурбурун, вердишарайбурун тIварцIихъни алхишарзава. Къенин макъала лагьайтIа, акьалтзавай несилдиз чешнелу тербия, спортдин рекье вердишвилер гузвай Къурбанов Назим Альбертовичаз талукьди я.
Ам 1987-йисан 29-январдиз Дербент шегьерда рабочийдин хизанда дидедиз хьана. 2004-йисуз шегьердин 15-нумрадин юкьван мектеб акьалтIарай жегьил Дербентдин педколледждин 3-курсуниз гьахьна. 2007-йисуз къецепатан чIаларин факультет агалкьунралди акьалтIарна. Идалай гуьгъуьниз Н.Къурбанов Дербентдин искусствойрин ва культурадин институтдин физкультурадин факультетдин 3-курсуниз гьахьзава. Амни, кIвалахдикай къерех тахьана, ада 2010-йисуз агалкьунралди акьалтIарна.
2009-йисан 1-сентябрдилай къенин йикъалди Назим Альбертовича Дербентдин 19-нумрадин юкьван мектебда физкультурадин муаллимвиле, гьа са вахтунда футболдай ва кьезил атлетикадай спортдин школада кьезил атлетикадай тренер-муаллимвилени зегьмет чIугвазва.
2013-йисалай ам шегьердин физический культурадин муаллимрин методикадин кIватIалдин ва кьезил атлетикадай шегьердин хкянавай командадин кьилин тренерни я. 2014-йисалай чи ватандашдал Дербент шегьердин ГТО-дин тестированидин центрадин регьбервилин везифаярни ихтибарнава.
2018-йисалай ам кьезил атлетикадай Вирироссиядин дережадин спортдин судья я. Къейд авун лазим я хьи, и дережадин пешекарар Дагъустанда мад авач. Алай йисалай ам Дагъустандин кьезил атлетикадин федерациядин вице-президентни я.
Н.Къурбанован намуслу зегьметдиз лайихлу къиметни ганва. Шабагьрин арада РД-дин образованидин отличник (2012-йис) лагьай хурудал алкIурдай знак, Россиядин Федерациядин образованидин ва илимдин министерстводин Гьуьрметдин грамота (2018-йис), РФ-дин тербиядин ва просвещенидин Гьуьрметлу работник лагьай тIвар (2020-йис) ва масабур ава.
Назим Альбертовичан чешнелу хизанда кьве велед чIехи жезва. Чи мурад акьалтзавай несилдиз тербия ва вердишвилер гунин карда адахъ мадни еке агалкьунар ва хизандани хушбахтвал хьун я.
Рагнеда Рамалданова
