12-майдиз “Дагъустан” РИА-да “Ачух власть” проектдин сергьятра аваз республикадин журналистрихъ галаз РД-дин здравоохраненидин министр Танка ИбрагьимоваН итижлу гуьруьш кьиле фена.
Мярекат ачухайдалай гуьгъуьниз “Дагъустан” РИА-дин директор Мегьамед Мегьамедова гаф Т.Ибрагьимоваз гана.
Министр Дагъустандин здравоохраненида хъсан патахъ хьанвай дегишвилерал ва бязи кимивилерал акъвазна. Ада республикада агьалийриз виниз тир технологийрин бинедаллаз ийизвай куьмекдикай суьгьбетна. Гьа са вахтунда 2017-йисуз Дагъустандин медицинадин идарайра винидихъ лагьанвай хьтин куьмек агакьдай азарлуйрин кьадар артухарун планламишнавайди къейдна.
— Виниз тир технологиядин медицинадин куьмек ОМС-дин (обязательное медицинское страхование) гьисабдай ийизвайди я. Ахьтин куьмек республикадилай къеце ийизваз хьайитIа, — давамарна Т.Ибрагьимова, — и вахтунда алава харжар (рекьериз, азарлудахъ галаз физвай ксариз, яшамиш жедай чкайриз…) акъатзава. Гьайиф хьи, и рекьериз государстводи такьатар ахъайзавач. Чи везифа Дагъустандин агьалияр сагъарун патал ВМП (высокотехнологическая медицинская помощь) чи республикадин маса регионра хьтин виниз тир еридинди авуникай ибарат я.
Эгер 2012-йисуз Дагъустанда ВМП-дин гьисабдай са операцияни авунвачтIа, 2015-йисуз ахьтин куьмек 3 агъзур касдиз, 2016-йисуз гьадалайни гзаф инсанриз авунва. Ахьтин операцияр авун патал герек тир тадаракар, пешекарар ва федеральный центради гузвай лицензия лазим я. 2017-йисуз ихьтин операцияр 4 агъзурдав агакьна авун планламишзава. Малумарзавай гьар са ВМП-дин гьисабдай ийизвай операциядин патахъай чна федеральный центрадин вилик гьахъ-гьисаб авуна кIанзава, — лагьана министрди.
Ведомстводин регьбердин гафарай малум хьайивал, алатай йисуз чагъа аялар, дидеяр кьиникьин дуьшуьшар тарихда тахьай хьтин кьадарда тIимил хьанва. Махачкъалада перинатальный центр ишлемишиз вахкайла, ихьтин дуьшуьшар мадни тIимил жедайдак умуд кутазва. Амни эцигна, тадаракламишна, хъсан пешекарар хкяна, куьтягьзава. Россиядин здравоохраненидин векилри и центр уьлкведа лап хъсанбурукай сад яз гьисабнава. Вири жуьредин къулайвилер авай и гуьзел дараматди алай йисан 1-июндиз дидеяр патал сифте яз вичин ракIар ачухда.
Алаудин Гьамидов
