2016-йисан 21-мартдин йифиз намусдикай пай таганвай вагьшийри СтIал Сулейманан кIвал-музей канай.
Йис алатна, лезги халкьдин намуслу рухвайри, вандалриз жаваб яз, лап куьруь вахтунда шаирдин цIийи кIвал-музей хкаж хъувуна! И кар патал вири халкь сад хьана.
Алай вахтунда музейдин залра чIехи шаирдин уьмуьрдин рехъ, яратмишунар, дуьньядихъ галаз адан алакъаяр раижзавай ирсиниз талукь экспонатар эхцигнава, музейдин майданарни хейлин гегьеншарнава. Иниз къведай рекье къир цанва. Шаир къекъвей жигъирар, ада ял ягъай чкаяр аваданламишнава.
И кардик чIехи пай кутурбурун жергеда алай аямдин зурба меценат, “Шарвилидин” суварин гьамишалугъ тамада, общественный деятель Имам Яралиев, Сулейман-Стальский райондин кьил, лезги чIалан къудратлу алим Нариман Абдулмуталибов, машгьур карчи ва сенатор Сулейман Керимов, скульптор Шариф Шагьмарданов, карчи Зураб Шайдаев ва масабур ава.
И йикъара цIийи музей арадал хканвай дережадиз килигиз Махачкъаладай кьиле РД-дин Гьукуматдин Председателдин Сад лагьай заместитель Анатолий Къарибов авай яратмишдай ва общественный деятелрин еке десте атанвай. Тамамарнавай кIвалахрилай абуру разивал къалурна.
P.S. Къе нисинин сятдин 12-даз Махачкъалада, 11-даз Сулейман-Стальский райондин Агъа СтIалрин хуьре чIехи шаирдин шииратдин межлисар кьиле фида. Ша, буюр, иштирака, гьуьрметлу ватанэгьлияр!
Мизамудин Магьмудов, Хазран Кьасумов
