“Виридуьньядин лезги халкьарин Конгресс” общественный гьерекатдин Ханты-Мансийский региондин чкадин отделение (ХМРО) Нефтеюганск шегьерда кардик кутуна. Идахъ галаз алакъалу мярекат шегьерда авай “Халкьарин культурадин центрада” кьиле тухудай мумкинвал гунай Нефтеюганск шегьердин кьил С.Дегтяреваз ХМРО гьерекатдин председатель Жалауддин Абдуразакьова чухсагъулдин келимаяр лагьана ва вири шегьерэгьлийриз Гъалибвилин сувар мубаракна. Ада Россияда жуьреба-жуьре адетар, культураяр, чIалар, динар авай гьар жуьре халкьар дуствилелди, стхавилелди яшамиш жезвайди къейдна.
Ж.Абдуразакьова “Виридуьньядин лезги халкьарин Конгресс” гьерекатни Россиядин халкьарин арада садвал, сихвал, абадвал, адалат, динрин, миллетрин ихтиярар хуьнин терефдар тирди, и общественный гьерекатди экстремизмдиз, терроризмдиз, миллетчивилиз, коррупциядиз аксивалзавайди къейдна.
Мярекатдал “Виридуьньядин лезги халкьарин Конгресс” гьерекатдин Нефтеюганск шегьердин чкадин отделенидин председателвиле Олег Пашаев хкяна.
Гьазурайди —
Земфира Бабаева
