Алай йисан 7 ва 8-ноябрдиз Москвада, Ирина Винер-Усмановадин тIварунихъ галай гимнастикадин Дворецда, кьуршахар кьунай международный турнир — Гран-При “Москва” акъажунар кьиле фена. Ам коронавирусдин тIугъвалдихъ галаз алакъалу карантиндилай гуьгъуьниз кьуршахар кьунай Сад хьанвай алемдин (UWW) календардай кьиле тухванвай международный сад лагьай чIехи акъажунар я.
Турнир Россиядин кьуршахар кьунай спортдин федерациядин сад лагьай президент Иван Ярыгинан экуь къаматдиз бахшнавай. Спортсменри и акъажунра анжах Олимпиададин къугъунрин заланвилерай чпин къуватар ахтармишзавай.
Алай йисуз и турнирда Россиядилай гъейри, дуьньядин 8 уьлкведин спортсменри чпин устадвал къалурна.
Лугьун лазим я хьи, цIи спортдин и серенжемдик азаддаказ ва грекринни римлуйрин жуьреда кьуршахар кьунилай гъейри, къумадал кьуршахар кьунин жуьрени кутунвай. Гьаниз килигна турнир кьиле физвай аренадал 70 тонн къум вегьенвай.
И акъажунра Дагъустандин хкянавай командадик кваз чи ватандашри — Милад Ализаева (87 кг-дал къведалди заланвал авайбурун арада) ва Анвар Аллагьярова (57 кг-дал къведалди заланвал авайбурун арада) гимишдин медалар къазанмишна. Абуру кьведани республикадин грекринни римлуйрин жуьреда кьуршахар кьунай школада чпин устадвал хкажзава. Къуй жегьилрихъ гележегда мадни чIехи агалкьунар хьурай!
«Лезги газет»
