(Эвел — 44-45-нумрайра)                   

Асгьабрикай виридалайни сифте иман гъайибур Пайгъамбардихъ (къуй Аллагьдин патай салават ва саламар хьурай вичиз): гъвечIибурукай — Али ибн Аби- ТIа­либ (8 йиса аваз), чIехи итимрикай — Абу- Бакр, дишегьлийрикай — Хадижагь, лукI­вилевай­бурукай — Билал (Аллагь рази хьурай чпелай виридалай).

Пайгъамбардин (къуй Аллагьдин па­тай­ салават ва саламар хьурай вичиз) кIва­лин эгьлияр, хизанарни асгьабрикай я ва адан папар  вири мусурманриз дидеяр (хьиз) я!

Мусурман уьмметдин иттифакь ава: ас­гьабрин арада хьайи фитнейрин, къалрин гьакъиндай чаз кисун, рахун тавун, абурукай вуж гьахъ ва вуж батIул я лугьуз къимет гун тавун важиблу я. Агьлу-сСунна валь-Жамаадин инанмишвал ам я хьи, а вакъиайра иштиракай кьве падни гьахъ жагъуриз чалишмиш жезвай. Дуьз къарар (решение) жагъайдаз (гьахълу хьайидаз) кьве суваб ава: гьахъ жагъуриз чалишмиш хьунай ва дуьз къарар жагъуру­най. ГъалатI хьайидаз са суваб ава: гьахъ жагъуриз чалишмиш хьунай (гъа­латI багъишламишзава). Асгьабар вири адалатлубур тир. Гьавиляй, абурукай чIурукIа рахазвай, са бязи ягъалмиш рекьевай кIапIалар — шиитрин, рафидитрин, чувудрин, диндин душманрин — гьахъдикай яргъа ава, Аллагьдиз аси­виле ава. Эгер абуру а гунагь кар акъвазар тавуртIа, абуруз пис жаза жеда.

Исламдин алимри лугьузва: “Чаз, му­сур­манриз, Мугьаммад пайгъамбардин (къуй Аллагьдин патай салават ва­ са­­ламар хьурай вичиз) асгьабар гзаф ­кIан­-за­ва. Абурукай садазни чна кьадардилай артух кIанивал (артух тарифун) гузвач ва садни абурукай чна кьабул тийиз, гьуьр­мет тийиз туш. Чаз асгьабар такIан ксар, абурукай хъсан рахун тийизвайбур такIан я ва чна асгьабар анжах хъсанвилелди ри­кIел гъизва (абурукай хийир рахазва). Абур кIан хьун дуьз дин я, имандикай я ва хъсанвал я. Абур та­кIан хьун куфр я, муна­фикь­вал я, зулум я.

Чна халифвал тестикьарзава Аллагьдин расулдилай (къуй Аллагьдин патай са­лават ва саламар хьурай вичиз) гуь­гъуь­низ, эвелни-эвел Абу-Бакр ас-Сид­дикьаз (Аллагь рази хьурай вичелай) —  адан акьалтIай лайихлувиляй. Ахпа (тестикьарзава халифвал) — Умар ибн ХатIтIабаз (Аллагь рази хьурай вичелай). Ахпа Усман­ ибн Аффаназ (Аллагь рази хьурай вичелай), Али ибн Аби-ТIалибаз (Аллагь рази хьурай вичелай). Абур (кьуд)  “хулафау ррашидун” (бажарагълу, диндар халифаяр ва Дуьз рекьин регьберар, имамар) я”.

(КьатI ама)

Ямин Мегьамедов,

диндин рекьяй алим