РД-дин экономикадин ва мулкар вилик тухунин министерстводи республикадин агьалийрин рикIел абуруз кьезил шартIаралди кредитар къачудай мумкинвал авайди хкизва. Идакай идарадин информациядин агентстводи хабар гузва.
“Чпи-чеб кIвалахдалди таъминарзавай (самозанятые) агьалияр патал МСП Банкди кредит къачуз кIанзавай ксарин арзаяр кьабулдай ва лазим документриз куьруь вахтунда килигдай махсус къайда туькIуьрнава. Кредит къачун патал яргъал мензилда аваз кредит къачудайвал туькIуьрнавай банкунин smbfin.ru АИС НГС системадин куьмекдалди ацIурнавай онлайн-арза ва анкета рекье тун лазим я. ГьакIни банкдив “Зи налог” сервисдай тир справка агакьарна кIанда. Кредитдиз талукь счет гьи банкда ачухайтIани жезва”, — лугьузва малуматда.
Пресс-къуллугъди рикIел хкайвал, идалай вилик “Россиядин гъвечIи ва юкьван карчивилиз куьмек гунин банк” АО-ди (МСП Банкди) чпи-чеб кIвалахдалди таъминарзавай ксариз гирав къачун тавуна гузвай кредитдин кьадар 1 миллион манатдив агакьдалди гзафарнай. Кредитдин 36 вацран вахтуналди гузвай ва дегиш тежезвай ставка 7,75 процентдиз барабар я. Ам къачунин макьсад гьихьтинди хьайитIани жезва. Кредит, винидихъ лагьанвайвал, гиравдин эменни къачун тавуна ва заминвалдай кас галачиз гузва: 500 агъзур манатдив агакьна — чпи-чеб кIвалахдалди таъминардай къайдадал цIийиз элячIнавайбуруз; 1 миллион манатдив агакьна — 3 вацралай гзаф вахт идалай вилик системада регистрация авунвайбуруз.
Кредит къачун патал агъадихъ галай документар агакьарна кIанзава: паспорт, ФНС-дай къачунвай ва “вичи-вич кIвалахдалди таъминарнавайди” яз налогрин учетда акъвазнавайдан гьакъиндай ва къазанжийрин гьакъиндай справкаяр (абур кьведни идарадин сайтдин “Зи налог” приложенидай къачуз жезва). Алава тир делилар агъадихъ галай нумрадиз зенг авуна жагъуриз жеда: +7 (968) 860 08 42.
«Лезги газет»
