Инсандин уьмуьр кьакьан дагъларин дерейрай зарбдиз авахьзавай гужлу вацIуз  ухшар я. Гьикьван­ селлер атана вацI рагъул хьайитIа­ни, виридаз чизва, ада вичин сифте­ кьил рагарайни къванерай акъат­завай михьи гьамга хьтин чешмейрилай гатIунзава. Чи ма­къаладин кьилин игитдин уьмуьрни гьахь­тин михьи чешмедиз ухшар я.

Адан гьар са къадам Европада виридалайни кьакьан тир Къурушрин хуьруьн вацIарилайни дагъларилай башламиш жезва. Къенин юкъузни ада намуслувилелди хайи Ватандиз къуллугъзава. Вири имтигьанрай полициядин подполковник   Хелеф  Вейселович  Гьафизов  баркаллувилелди экъечIна, датIа­на ви­кIегьвал, жуьрэтлувал, вафалувал къалурна…

И къилихар Х.Гьафизова Ватандин ЧIехи дяведин иштиракчияр — набутар хьайи вичин буба Вейселалай, ими Даниялалай, гзаф йисара полициядин къуллугъчи хьайи майор­ Бейбала Магьсудовичалай къачунвайбур ятIа?

Хелеф Вейселовичан къуллугъдин рехъ, лугьурвал, гурарин гьа сифте кIарцIелай башламиш хьана, са-сад гьисабиз, винелди хкаж хьана. И рекье адал четинвилер гзаф ацалтна, амма дурум гана, вичин везифаяр намуслудаказ кьиле тухвана. Гьелбетда, полициядин жергейра къуллугъзавай гьар са  касдал вири жуьредин къилихрин инсанар дуьшуьш жезва. Гьавиляй виридаз мукьуфдивди фикир гун, кIан-пун ахтармишун чарасуз я. Милиционер лагьайла, бязибуру акI фикирзава хьи, гуя ам жаллатI я. Садни садрани ягъалмиш хьун герек туш: полициядин къуллугъчи­дин кьилин мурад-макьсад тахсиркар жазала­мишун ваъ, ам тербияламишун, дуьз рекьел хкун я. Низ чида, абуру шу­муд кас, шумуд хи­­­зан дуьз рекьел хканатIа, шумуд тахсиркар­вилин вилик пад кьунатIа? За Хелеф Вейселовичавай и кардин гьакъиндай хабар кьурла, ада заз акьал­тIай жа­ваб ганач, амма адахъ галаз санал кIвалахай юлдашри адакай заз сирер ачухна. Хелеф Гьафизова къуллугъдин йисара цIудралди жегьилар дуьз рекьел хкана. Къе ада  кIвалахай Тарумовкада, Белижда, Кьасумхуьрел яшамиш жезвай гзафбуру и касдин тIварцIихъ хуш келимаяр лугьузва.

Х.Гьафизов 1948-йисан 1-апрелдиз Докъузпара райондин Къурушрин хуьре Ватандин ЧIехи дяведин иштиракчи  Вейсел бубадинни Инжи бадедин хизанда дуьньядал атана. Вини Къурушдал — 8 ва  Хасавюрт райондин ЦIийи Къурушдал 11 классар куьтягьна. Хелефа кьве йисуз Хасавюрт шегьерда авай  консервияр гьазурдай заводда кIва­лахна. 1967-1969-йисара СССР-дин Яракьлу Къуватрин жергейра къуллугъайдалай кьулухъ Хасавюрт шегьердин ГОВД-да кIвалахал акъвазна. Х.Гьафизован алакьунриз килигна, ам ГОВД-дин начальникдин къарардалди Астраханда авай милиционерар гьазурдай махсус школадиз рекье туна. 1973-йисуз­ анаг агалкьунралди куьтягьай жегьил лейтенант Тарумовкадин РОВД-диз уголовный розыскдин оперуполномоченныйвиле, са йисалайни уголовный розыскдин начальникдин заместителвиле тайинарна. Гуьгъуьнлай 1984-йисан январдалди гьа отделдин начальникдин везифаяр кьиле тухвана. Январдин эхиррай Хелеф Вейселович Дербент райондин Белиж поселокдин отделдин начальниквиле тайинарна. Вад вацралайни адал Сулейман-Стальский райондин РОВД-дин начальникдин къуллугъ ихтибарна, 1991-йисан апрелдалди гьана ада вичин везифаяр намуслудаказ кьиле тухвана.

Хелеф Вейселовичан кIвалах­дин гьа­къин­дай гьа йисара райондин ГАИ-дин старший инспекторвиле кIвалахай, алай вахтунда отставкада авай майор Къарибов Мирзекерима рикIел хкизва: “Дугъ­риданни, подполковник Гьафизов вичин кIва­лахдиз вафалу кас тир, вич виридаз чешне къалурдай, вичин къуллугъдал ашукь. Райондин ОВД-дин вири отделра низам-къайда хуьзвай, виридавай кIвалах уставри тIа­лаб­завайвал истемишзавай, хала-хатурвал кIанда­чир, вири крарив гьахълудаказ эгечIдай. Гьавиляй Хелеф Вейселовича къуллугъай йисара Кьасумхуьруьн РОВД са шумуд йисуз республикада кIвен­кIвечи жергейра хьана, Да­гъустан­дин къенепатан крарин министерстводин гъиляй-гъилиз къведай Яру Пайдах пуд йисуз гьа и РОВД-да амукьна. Районда жегьилрин арада чIуру крар авуниз рехъ ганач, низам, къанун-къайда мягькемарна, тахсиркарвилерин кьадар тIимиларна”.

Вичин кIвал-югъ Тарумовкада хьуниз килигна, подполковник Гьафизова са шумуд се­ферда Дагъус­тандин МВД-дин министрдивай вич мад Тарумовкадин РОВД-диз рекье хтун тIа­лабнай. Эхирни, 1991-йисуз Хелеф Вейселович анин оперативный крарин отделдин начальникдин заместителвиле рекье хтуна ва 1996-йисалди ада и къуллугъдал кIва­­­лахна. Алай вахтунда ада адвокат яз зегь­мет чIуг­вазва.

Уьмуьр вахтунин кьадардалди ваъ, ла­йих­лувилерални баркаллувилерал алцумзавай шей я. Инсандин гафарилай гзаф адан крариз къимет гузвайди я. Гьелбетда, жуван ватан­эгьлидихъ агалкьунар хьун гьар садан кьи­лин­ винизвал я. Хелеф Вейселовични гьахьтинбурун жергейрик акатзава. Ам гзаф мергьяматлу, къени къилихрин, гъил ачух, ча­ра касдин дердиникай хабар кьадай, са кIусни дамах гвачир, авай гаф чинал лугьудай, дуст­ни-душман ахтармишдай кас я. Ибур вири ха­лис дагъвидиз хас лишанар я. Гьавиляй ада чIехи­бурун, ярар-дустарин, хуьруьнвийрин арада еке гьуьрметни  нуфуз къазанмишнава­.

Гзаф йисара жуьреба-жуьре жавабдар къуллугърал зегьмет чIугур адан кIвалахдиз лайихлу къиметни ганва. Хелеф Вейселови­чахъ 40-далай гзаф гьукуматдин шабагьар ава. Ам “За отличие в службе МВД” (3,2-де­ре­жадинбур, “100 лет со дня рождения В.И.Ленина”, “200 лет МВД”, “За верность долгу”, “За службу России”, “Ветеран труда”, “За заслуги в защите прав и свободы граждан” медалрин, Россиядин ва Дагъустандин МВД-рин министррин, Дагъустандин Госсоветдин ва маса тешкилатрин гьуьрметдин грамотайрин, къиметлу пишкешрин сагьиб я.

Хелеф Вейселовича вичин уьмуьрдин юлдаш Зинадихъ галаз чешнелу хизан арадал гъана: кьве гадани са руш чIехи авуна. Гьайиф хьи, бубадин рехъ давамарзавай Ал­хазур, адан стха Султан аварийрик акатна телеф хьана. Хтул — Алхазуран хва Азиз гьуьле батмиш хьана. Алай вахтунда бубадинни бадедин рикIиз теселливал хгузвайбур Султанан кьве гада — кьве хтул я. Кьисметдикай катиз жедач, лугьузва бубайрин мисалда…

РФ-дин къенепатан органрин къуллугъчидин югъ тебрик авунихъ галаз сад хьиз, чна квез, гьуьрметлу Хелеф Вейселович, чандин сагъвал, рикIин динжвал хьун, гележегда анжах куь уьмуьрда шад вакъиаяр хьун алхишзава.

Гьажи Къазиев