РусГидродин дестедик акатзавай гидроэлектростанцияр, чимивал гудай станцияр, сетевой комплекс ва теплосетрин къурулуш хъуьтIуьн вахтунда кIвалахиз гьазур я, хабар гузва идарадин Дагъустанда авай филиалдин пресс-къуллугъди. Алукьзавайди энергетикар патал иллаки четин вахт я, гьикI лагьайтIа, гьавадин чимивал агъуз аватнамазди, ишлемишзавай электричество ва чимивилин энергиядин кьадар са шумуд сеферда артух жезва.
ТIугъвалдихъ галаз алакъалу сергьятвилер авай шартIара РусГидроди энергообъектрин кIвалахдин дурумлувал ва муьштерийрал электроэнергия атIунар авачиз агакьарун, гьакIни къурулушдин объектрал кIвалахзавай ксар азардикай хуьн таъминарзава.
РусГидродин объектар хъуьтIуьз гьазур тирдакай компаниядин кьил Николай Шульгина и йикъара хьайи электроэнергетикадин субъектар 2020-2021-йисарин зулунни хъуьтIуьн сезондиз гьазур хьуниз талукь Вирироссиядин совещанидал малумарна. Ада хабар гайивал, чIехи пай субъектрин гьазурлухвилин индексар 0-диз барабар я — энергообъектар кьуьд къаршиламишиз гьазур я. Вири энергообъектра чимивал гудай сезондин вахтунда лазим тир материалринни техникадин ресурсрин герек кьадар ава. КIвалахзавай ксарихъ галаз алава гуж акьалтзавай вахтунда тамамарна кIанзавай серенжемриз талукь вердишвилер (тренировки) кьиле тухванва. Идалайни гъейри, Роспотребнадзордин ва Россиядин Минэнергодин теклифар кваз кьуналди, объектрал инфекция чукIунин вилик пад кьунин месэладиз кьетIен фикир гузва.
«Лезги газет»
