Накь, 12-ноябрдиз, Дагъустандин Кьилин везифаяр вахтуналди тамамарзавай Сергей Меликова республикадин СМИ-рин векилрихъ галаз гуьруьш кьиле тухвана. Мярекат Махачкъалада, Дуствилин кIвалин дараматда кьиле фена.

Гуьруьш тайин тир сергьятар эциг тавуна кьиле фена. Гьар са иштиракчидиз республикадин Кьилиз суалар гудай мумкинвал авай.

Милли чIаларал акъатзавай газетрикай рахадайла, Сергей Меликова абурухъ хайи чIалар, меденият, тарих, адетар хуьнин жигьетдай еке метлеб авайди къейдна. Адан фикирдалди, милли газетар Дагъустандин еке девлет я ва республикадин руководстводи абур хуьниз ва вилик тухуниз кьетIен фикир гудайвал я.

Мярекатдал жуьреба-жуьре месэлаяр веревирдна. Абурун жергеда сиясатдиз, жемиятдиз, медениятдиз, яшайишдиз… талукьбур авай.

Сергей Меликов республикадин кьиле акъвазна са акьван вахт алатнавач. Гьавиляй адан кIвалахдиз къимет гун гьеле фад я. Гуьруьшди къалурайвал, Дагъустандин кьилиз цIийиз атанвай касдихъ регион вилик тухунин жигьетдай гзаф фикирар ава. Кьилин фикир халкьдинни гьукумдин арада авай алакъаяр мягькемаруниз гуда. Эгер и кар кьилиз акъудиз алакьайтIа, халкьди гьукумдиз ийизвай ихтибарни гзаф жеда. ИншаАллагь!

Гуьруьшдикай гегьенш макъала «Лезги газетдин» къведай гьафтеда акъатдай нумрадай кIелиз жеда.

Мегьамед Ибрагьимов