Яшлу несилдин векилри ихтилатзавайвал, цIуд йисар идалай вилик газетринни журналрин киоскрихъ еке учирар жедай. Къенин юкъуз еримлу жезвай технологияди, интернетди басмадин СМИ-яр бегьем басрухдик кутунва. Идалай вилик акъатай бязи газетар къе интернетдин сайтриз элкъуьн хъувунвай мисаларни тIимил авач. Амма милли газетрин месэла кьетIенди я…
ГъвечIи халкьарин чIаларал акъатзавай газетринни муькуьбурун арада абурун эгьмиятдин жигьетдай авай тафаватдизни фикир тагана тун дуьз туш: кьвед лагьайбуру чпин асул везифаяр кьилиз акъудзаватIа, сад лагьайбурун хиве алава яз хайи чIал, меденият хуьнин лап важиблу буржини ава. Инал “Лезги газетди” и жигьетдай тухузвай кIвалахдикай баянар гун артухан кар жеда — кIел-чийриз гьакIни ашкара я. Гьа и себебдай милли газетар абурухъ эхиримжи кIелчи амай кьван чапдай акъудунин чарасузвал ава лугьуз жеда. Къенин юкъуз газет гъиле кьуна хабарар кIелунал рикI алай ватанэгьлияр чахъ гзаф ама. Гьавиляй чарчин СМИ-яр, гьа жергедай яз РД-дин милли чIаларал акъатзавай жемиятдинни сиясатдин газетарни вилик тухун, абурун “уьмуьр” яргъи ийиз алахъун чи умуми везифадиз элкъуьн герек я.
“Лезги газетдин” 100 йисан юбилейдин цIинин йисни (ашкара себеб аваз суварин мярекатар цIи тешкилиз хьаначтIани) саки акъатнава. Алай йисан кьвед лагьай паюна тIугъвалди газетдин тиражни са кьадар агъуз авудна.
Исятда чи вилик 2021-йис патал газет кхьинин (подписка) кIвалах акъвазнава. Хквезвани куь кIвализ республикадин дережада хайи чIалал акъатзавай газет?
Са хъсан хабарни гуз кIанзава: алай йисан 15-ноябрдилай “Лезги газет” Россиядин Почтадин сайтдиз ва мобильный приложенидиз акъатда. И карди, жув авай чкадилай аслу тушиз, санизни фин тавуна, ацукьай кIвале Дагъустандин мулкара авай ватанэгьлияр, багърияр патал “Лезги газет” кхьидай мумкинвал гузва. Урусатдин жуьреба-жуьре шегьерра авайбуру Дагъустанда авай чпин мукьва-кьилияр патал газет кхьиз кIанзава лугьудай фикирар алатай йисарани малумарнай. Къе гьахьтин къулайвал хьанва.
Ша чна вирибуру газетдин тираж хкажуник пай кутан — им чи миллетдин кьилин винизвални я. Са шакни алачиз!
К.Ферзалиев
