Самурдин тамун экология къайдада хьун неинки тIебиатдин шартIарилай, гьакIни инсанди кьиле тухузвай кIвалахрилай аслу я. Самурдин там вичихъ тешпигь авачир, надир там я. Адан мулкунал федеральный важиблувал авай объектар ала: надир тарар, жуьреба-жуьре балугъри тIебии шартIара куьр гадарзавай, санай масаниз куьч жезвай ва кьуьд акъудзавай къушари мукар кутазвай чкаяр. Ина гьакIни вагьши гьайванар гьалтзавай чкаярни ава.
Даглесхоздин пресс-къуллугъди хабар гузвайвал, РД-дин тамарин майишатдин рекьяй Комитетдин председателдин везифаяр вахтуналди тамамарзавай Вагьаб Абдулгьамидова чи чилел алай надир там хуьнихъ галаз алакъалу яз арадал къвезвай четин месэлаяр гьялуниз кьетIен фикир гузва. И жигьетдай асул чка там цIаярикай хуьнин, ана михьивал таъминарунин месэлайри кьунва.
ИкI, и йикъара Самурдин тама майишатдин тамухъанри волонтеррихъ галаз санал, “Там хуьн” серенжемдин сергьятра аваз, субботник кьиле тухвана. Тамун мулкар кьурай кIарасрикай, яшайишда жезвай ва маса жуьредин зирзибилдикай михьна. Тамухъанри кьиле тухузвай вири кIвалахар тIебиатдин и надир пIипI хуьнихъ элкъуьрнавайбур я, къейдзава идарадин пресс-къуллугъди.
«Лезги газет»
