16-майдиз Дагъустандин Кьил Рамазан Абдулатипов  РФ-дин Силисдин комитетдин РД-да авай Силисдин управленидин руководитель Сергей Дубровинахъ галаз гуьруьшмиш хьана. С.Дубровин и къуллугъдал Россиядин Президент Владимир Путинан 2017-йисан 1-майдин 192-нумрадин Указдалди тайинарнавайди я.

Мярекатда Россиядин Силисдин комитетдин председателдин заместитель Борис Карнаухова иштиракна.

РикIел хкин, виликдай юстициядин генерал-лейтенант Сергей Дубровина Тульский областда, Ставропольский крайда СКР-дин гьа ихьтин управленийриз регьбервал гана, прокуратурадин органра кIва­лахна. Ам 1966-йисан 30-декабрдиз Тамбовский областдин Куксово хуьре диде­диз хьана, ада Саратовдин государстводин­ юри­дический академия куьтягьна. Адаз “Ди­рибашвиляй”, “Яракьлу Къуватрин 70 йис”, “Разивалзавай Афгъанистандин халкь­дин патай” медалар, “Ватандин вилик­ лайихлувилерай” II дережадин ордендин медаль, ведомстводин шабагьар, гьакI­ни тIвар кхьенвай яракь ганва.

Гьа и юкъуз Сергей Дубровин Рамазан Абдулатипован иштираквал аваз РФ-дин Силисдин комитетдин РД-да авай Силисдин управленидин коллективдихъ галаз официальнидаказ танишарна.

“Сергей Дубровин  пешекарвилин чирвилер ва жуьреба-жуьре къуллугърал алаз регьбервал гунин кIвалах тухунин чIехи тежриба авай кас я. Зун инанмиш тирвал, ада вичин хиве тунвай везифаяр лайихлудаказ кьилиз акъудда”, — къейдна Борис Карнаухова.

Рамазан Абдулатипова Дагъустандин месэлайриз дуьзгуьндаказ фикир гунай кьиле Александр Бастрыкин авай Россиядин Силисдин комитетдин руководстводиз сагърай лагьана.  “Къейд авун лазим я хьи, абур активнидаказ къаришмиш хьунин нетижада чавай са жерге рекьерай кIвалахда къайда тваз алакьна. Им республикада ми­хьидаказ, уьтквемдаказ кIвалахай Эдуард Валерьевич Кабурнеев кьиле авай вири коллективди тухванвай зурба кIвалахни я.

Дагъустандин территорияда Россиядин гражданрин саламатвал умудлудаказ хуьн патал чун активнидаказ санал кIва­лахиз гьазур я. За гьисабзавайвал, эхиримжи йисара регионда къанун-къайда хуьдай органрин блокдихъ галаз санал лап жанлу команда арадал атана. Гележегдани гьукум кар бажармишиз, нетижалудаказ кIва­лахиз алакьдайди хьун герек я. Заз цIийи ру­ководителдихъ агалкьунар хьун, Да­гъус­тандикай адаз хъсан фикирар амукьун­ кIанзава”, — лагьана РД-дин Кьили.

Вичин нубатдай яз Сергей Дубровина РФ-дин Силисдин комитетдин РД-да авай Силисдин управленидин коллективди Да­гъустандин ва Вирироссиядин абадвал патал властдин органрихъ ва къуватдихъ галаз алакъалу къурулушрихъ галаз са­нал­ди бегьерлудаказ кIвалахун давамардайдахъ инанмишарна.