Алатай саласа йикъан (16-май) пакаман сятдин 10 Махачкъала шегьердин Ирчи Казакан тIварунихъ галай куьчедин сифте кьиле Дагъустан Республикадин МВД-дин миграциядин месэлайрал машгъул управление авай дараматдин вилик, гьакI дегьлизрани гзаф инсанар кIватI хьанва. Абурун арада къецепатан уьлквейрай атанвай агьалиярни тIимил авач. Гьардахъ вичин дерт (садбуруз кIвалах кIанзава, муькуьбаруз чеб регистрация авун, пуд лагьайбуруз — паспортар ва маса документар къачуз ва икI мад) ава.
Абурун гъавурда зун управленидин залда пресс-конференция кьиле фидайла акьуна. Мярекатдин кIвалахда винидихъ тIвар кьунвай управленидин начальник Мегьамед Мегьамедова, адан заместитель Арсен Амирханова, миграциядин къуллугъдин отделрин начальникри ва газетринни телевиденидин журналистри иштиракзавай. Журналистрихъ (са садахъ) галаз таниш хьайидалай гуьгъуьниз ведомстводин регьберди вичин суьгьбет башламишна.
— Алай йисан 4 вацра государстводин сергьярин махсус пунктарилай элячIна Дагъустандиз 205 агъзурни 989 къецепатан уьлквейрин гражданар атанва (2016-йисан талукь вахтунда 242 агъзурдалай виниз атанвай), — лагьана М.Мегьамедова. Абурукай 18 агъзурдалай гзаф инсанар чи республикада амукьна ва учетдани акъвазна. Ибурун чIехи пай Азербайжандин ва Узбекистандин агьалияр я. Кьилин себебни — чпин ватанра кIвалах тахьун.
Мегьамедова кьейд авурвал, управленидин къуллугъчийри чпиз ина яшамиш жедай ихтияр авачир (гражданство фикирда ава) къецепатан агьалийрал гуьзчивал тухузва, чинеба, къалп документар, миграциядин картаяр гвачиз атанвайбуруз рехъ гузвач. Гьа икI, къецепатан агьалияр яшамиш жезвай объектра 550-далай виниз ахтармишунар кьиле тухьанва. Нетижада административный къайдаяр чIурай 4 агъзур дуьшуьш дуьздал акъуддай мумкнвал хьана. Абур 11 миллиондив агакьна жерге авуна. Адакай 6 миллиондилай виниз чкадал хкиз алакьна, — алава хъувуна М.Мегьамедова. Ада мадни къейд авурвал, чи респубдикадай 234 агъзурдалай гзаф къецепатан агьалияр хъфенва (2916-йисуз и рекъем 222-даз барабар тир). Гьа са вахтунда учетдай акъудна хъфенвайди 11 агъзур кас я. «Чун къецепатаз физвай чи агьалияр, иллаки жегьилар, гуьзчивилик кутаз чалишмиш жезва — гьабурун хатасузвал хуьн патал, — лугьузва М.Мегьамедова. Чун, жегьилар загранпаспортар кIанз атайла, абурун диде-бубайрихъ мукьва-кьилийрихъ галаз алакъалу жезва. Алава яз, и кас къецепатан уьлкведиз финин мурад (себеб) чирзава. Ахьтин вахтар жезва хьи, ахьтинбур гьакъикъи себеб лугьун тавуна, табна, экъечIна физва. Ахпа, боевикрихъ галаз алакъада авайди авайди чир хьайила, гьарай акъатзава. Гьиниз килигна, и жигьетдай кIвалах хъсанарун патал чна къайдаяр хуьдай вири къурулушрихъ галаз алакъа хуьзва, — алава хьувуна управленидин начальникди.
Миграциядин месэлайрал машгьул тир управлениди вичин агьалийриз къуллугъ авунин кIвалахдин ери хъсанарун патал чалишмишвалзава. ИкI Дагъустанда яргъал тир районрин агьалийриз государстводин къуллугъар чкайрал физ тешкилзава. Мисал яз, управленидин къуллугъчийри паспортар, гьа жергедай яз загранпаспортар патал герек документар кIватIзава. Гьа икI, йисан сифтедилай инихъ «Дагъустандин агьалийриз — МВД-дин къурулушдик акатзавай Госкъуллугъар» акциядин сергьятра аваз республикадин 16 райондиз фенва ва цIийи жуьредин загранпаспортар къачун патал 542 арза кIватIнава, — давамарна М.Мегьамедова.
Гьахъ-гъисабдин девирда Дагъустанда 40465 паспорт (цIийибур, квахьайбурун ва 8 чуьнуьхайбурун гьисабдай) Дагъустандин УФСИН-дин къурулушда дустагъра ацукьнавай 65 касдиз паспортар ганва.
Пресс-конференциядин эхирдай миграциядин месэлайрал машгьул управленидин регьберди журналистрин хейлин суалризни таватар гана.
Алаудин Гьамидов
