Алатай йисан эхирра вири дуьньядиз чкIай тIегъуьн закни акатна. Лап са куьруь вахтунда зи бедендин гьал кьадарсуз пис хьана, захъ гьатта жуван кIвачералди больницадиз фидай къуватни амукьнач. Зун Кьурагьрин райбольницадин са жерге духтуррин куьмек тIалабуниз мажбур хьана. Абурун пешекарвилинни къайгъударвилин нетижада зун кIвачел ахкьалт хъувуна. И кардай заз абуруз газетдин чинилай чухсагъул лугьуз кIанзава. Зун абуруз уьмуьрлух буржлу я…
Сифте зи гьалдикай Гьажимурадов Агъаширин духтурдиз хабар гана, заз герек раб-дарман кхьена ва абур ишлемишунин вахтарни къалурна. Ада мукьвал-мукьвал зи гьалдикай хабар кьадай, мукьвара сагъ хъхьана, кIвачел ахкьалт хъийидайдахъ зун кIевелай инанмишардай. Ахпа азардин фендигарвили тади гузвай зи гьарайдиз Рамазанова Гуьлзада духтур акъатна. Ам зи патав гьар юкъуз къвез хьана, саки 15 юкъуз азардихъ галаз женг чIугуна, ада зун кIвачал ахкьалдарун патал, галатун тийижиз, зегьмет чIугуна. Зун хьтинбур, яни сагъламвал лап зайиф хьанвай азарлуяр а чIавузни гзаф авай. Гуьгъуьнлай чир хьайивал, Гуьлзада духтурди, четин гьалда авай вири азарлуйрин патарив кIвалериз физ, абурузни вичивай жедай вири жуьредин куьмекар гузвай кьван.
Саки цIувад юкъуз раб-дарман ишлемишайдалай гуьгъуьниз Маллаева Мая духтурдини зи бедендин сагъламвал ахтармиш хъувун меслят къалурна. Сифте нубатда ада заз медицинадин са жерге серенжемар кьиле тухун меслят къалурна. Гуьгъуьнлай, зи гьал са кьадар хъсан хъхьанвайтIани, мадни са кьадар вахтунда тамамвилелди сагъ хъхьун патал герек раб-дарман ишлемиш хъувун теклифна. Лугьудайвал, жув тамамвилелди сагъар хъувунин кьвед лагьай пай башламишна. Заз инал мад сеферда винидихъ лагьай келимаяр тикрар хъийиз кIанзава. Куь чалишмишвилерни алахъунар себеб яз, Мая духтур, зун тамамвилелди сагъ хъхьанва. Амма кьадарсуз гьайиф жедай кар ам хьанва хьи, завай куь чешнелу зегьметдиз тамамвилелди къимет гуз жедай гафар жагъуриз жезвач.
Кьадарсуз четин вахтунда зи дидардиз атай, вич и четин ва баркаллу пешедив мукьвара эгечIнавай Алиев Исамудин духтурдизни за рикIин михьивилелди чухсагъул лугьузва. За вад-ругуд йис идалай вилик Кьурагьрин 1-нумрадин юкьван школада тарсар гайи, къенин юкъуз райондин агьалийрин сагъламвилин къаравулда акъвазнавай и баркаллу пешедин иесидал дамахзава. Гележегда адан гъиликай агъзурралди чи районэгьлийриз куьмек жедайдак кIевелай умуд кутаз кIанзава.
Жуван са куьруь макъалада завай райбольницадин вири духтуррин тIварар кьаз жезвач. За абурувай рикIин михьивилелди багъишламишун тIалабзава. Кар, белки, абуру агьалийрин сагъламвилин къуллугъда акъвазда лагьана кьин кьунал алач жеди. И кIвалах заз жуван уьмуьрда мукьвара ачухдаказ акуна. Белки, гьа духтуррихъ галазни чун газетрин чинра лап мукьувай таниш хъжеда. Инсанрин сагъламвилин къуллугъда акъвазна, галатун тийижиз зегьмет чIугвазвай абурун баркаллу кар къейд авуниз чун кIевелай буржлу я. Белки, фикирзава за гила, жув тамамвилелди сагъ хъхьайдалай гуьгъуьниз, ишлемишзавай раб-дармандилай азарлудаз духтурдин ширин меци, адан къайгъударвили, азарлудахъ рикI куни ва сагъ хъхьуник умуд кутуни гзаф таъсирзаватIа?! Шаксуз, гьакI я. Сагърай чеб вири! Аллагьди чпиз хъсанвилер гурай!
Абдула Семедов, Кьурагьрин хуьр
