Эхиримжи вахтара чна COVID-19 азардикай малуматар, адакай хуьн патал меслятар гзаф гузва. Гьайиф хьи, залан амай азарарни, гьа гьисабдай яз вири инсаниятдик къурхулувал кутазвай онкологияни чи уьмуьрдай акъатнавач…
Алатай гьафтедин ял ядай юкъуз Махачкъалада, Республикадин онкоцентрада, ачух ракIарин йикъан сергьятра аваз вишелай виниз дишегьлийри некIедин железадин гьал ахтармишна. Къейдна кIанда хьи, вири дуьньяда хьиз, чи республикадани гьар йисуз октябрдин вацра иллаки артух фикир гузвай и месэладиз талукьарна кьиле тухузвай серенжемрин макьсад, вахтунда вилик пад кьун тавуртIа, чIуру нетижайрал гъизвай и азардикай хабар гун, дишегьлийри чпин сагъламвилин къайгъу чIугунал фикир желб авун я. Гьайиф хьи, дишегьлияр рак азардикди начагъ хьунал гьалтайла, некIедин железадин онкология 1-чкадал ала. Пешекарри къейдзавайвал, беденда чIуру азар пайда хьайивалди (1-стадияда амаз), ам дуьздал акъудай 98% дуьшуьшра инсан тамамвилелди сагъариз жезва. Инал кар алайди вахтунда чир хьун я. Медицина санал акъвазнавачтIани, ада йигиндаказ виликди еримишзаватIани, вахт гъиляй ахъайнавайла, инсан кьиникьал гъизвай и азардихъ галаз женг чIугваз лап четин жезва.
Алай йисуз, ачух ракIарин сергьятра аваз, 115 дишегьлиди чпин сагъламвал ахтармишна. Гьайиф хьи, шадвал кутадай гьалар авач. Ахтармишунрик неинки духтурри килигун (осмотр), гьакIни УЗИ, лазимбуруз маммография авун, цитологиядиз талукь анализ кьиле тухунни акатзавай. Нетижада (69 касдин УЗИ ва 54 касдин маммография авуна) 106 дишегьлидиз мастопатия, 7-даз дакIунар (доброкачественный) авай, садак ракдин азар ва мадни садак (дуьм-дуьз чирун патал биопсия къачунва) рак азар кваз хьунал шак физвай дуьшуьшар дуьздал акъудна.
Чна мад сеферда чи дидейриз, вахариз, рушариз, сусариз эвер гузва: азар дериндиз фидалди, адан вилик пад кьаз регьят я.
«Лезги газет»
