Жув яшамиш жезвай чкада, кIвалахзавай коллективда гьуьрмет къазанмишун гьар са кас патал еке бахт я. Лезги халкьдин векилри хайи ватандивай яргъа, маса миллетрин арада гьуьрмет къазанмишун чун, ватанэгьлияр, патални шадвал кутадай кар я. Саратов шегьерда медицинадин хиле кIвалахзавай кьасумхуьруьнви Шамил Мейланов чаз патавай чидач, акур касни туш. Амма адан намуслу зегьметди, азарлудахъ галаз вич тухузвай тегьерди ам чи рикIиз мукьва авуна, чна адакай газетда макъалани кхьизва…
И йикъара “Куьредин хабарар” газетдин редакциядиз “Шииратдин Меккадай” — Агъа СтIалдилай тир 75 йисан яшда авай мегьрибан дишегьли Рабият Абдурашидовна Гьуьсейнова атана. Ада чаз вичин “дерди” ахъайна. Малум хьайивал, мукьвал вахтара ам Саратов шегьерда яшамиш жезвай вичин рушан патав мугьманвиле фенвай. Садлагьана адаз пис хьана. Руша вичин диде шегьердин уронефрологиядин клиникадиз тухвана. Рабият Абдурашидовна операция авуна, адан дуркIунрай къванер акъудна, са шумуд йикъан къене ам сагъар хъувуна.
— Жув-жувал хтайла, заз чир хьана хьи, операция авурди, лугьудайвал, зун ажалдин къармахрай акъуд хъувурди лезги духтур, кьасумхуьруьнви Шамил Низамиевич я. Палатадиз атайла, ам захъ галаз “диде” лугьуз рахана, захъ вичин хайи дидедихъ хьиз гелкъвена, — суьгьбетзава дишегьлиди.
Р.Гьуьсейновади гуьгъуьнлай чаз Шамил духтурдикай, адан ширин мецикай, хуш рафтарвиликай мадни ихтилатарна.
Рабият Абдурашидовнадив Шамил духтурдикай кхьенвай макъалаяр авай “Саратовдин хабарар” газетдин са шумуд нумрани гвай. Са макъалада 86 йис хьанвай Лидия Семеновади Шамил вичин хва я лугьузва. Маса макъаладай малум жезвайвал, Ватандин ЧIехи дяведин ветеран, орденринни медалрин сагьиб Михаил Колесникова Саратов шегьердин администрациядиз Шамил духтурдиз «Саратов шегьердин гьуьрметлу агьали» гьуьрметдин тIвар гунин патахъай чар кхьенва…
Яргъал шегьерда лезги хциз урус миллетдин векилри, ада сагъар хъувур ксари еке гьуьрмет ийизвайди чир хьайила, чазни гзаф шад хьана.
Журналистрик, шад хабар атайла, лувар акатда. Газет кIелзавайдан тIалабун кьилиз акъудун журналистриз къанун я. Пакадал вегьин тавуна, гьа юкъуз чун Шамил духтурдин диде-буба вужар ятIа жагъурунин къайгъуйра гьатна. Духтурдин диде-буба чаз фадлай хъсандиз чизвайбур яз хьана: Пенсионный фондунин Сулейман-Стальский районда авай отделенидин кьилин пешекар Низами Мейланов ва райондин центральный больницадин духтур-эндокринолог Анжела Мейланова.
Дуьз лугьузва бубайрин мисалда: катран мукай кард къарагъда. Хуьре-кIвале, кIвалахзавай коллективра гьуьрмет авай Низами ва Анжела Мейлановрихъ низамлу кьве хва ава — Шамил ва Муслим. Муслима кьилин образование къачуна, юриствилин пешедай кIвалахзава.
Шамил Кьасумхуьрел (ЦIийихуьре) 1993-йисуз дидедиз хьана. Ада юкьван школа лап хъсан къиметар аваз акьалтIарна. Гьеле 8-классда кIелзавайвала, гьарда вичиз гележегда хкядай пешедикай сочинение кхьинин тапшуругъ гайила, Шамила сочиненидиз “Закай духтур жеда” лагьана кьил ганай. Жаван вахтарилай рикIе авай мурад кьилиз акъудун патал Ш. Мейланов 2010-йисуз Саратовдин В. И. Разумовскийдин тIварунихъ галай госмедуниверситетдик экечIна. Ана кIелдай йисара, 1-курсунилай эгечIна, эхирдалди Шамил университетдин лап хъсан студентрин арада хьана.
2016-2018-йисара Ш. Мейланова Саратовда кардик квай С.М. Миротворцеван тIварунихъ галай клинический ординатурада кIелна, вичин чирвилерин дережа хкажна, пешедин рекьяй тежриба къачуна.
Хъсан чирвилер авай пешекардиз — кьегьал лезги хциз — вичи акьалтIарай медицинадин университетда преподавателвилин кIвалахни теклифна. Амма Шамила вичин кIвалахдин чка — больница, хиве авай везифани начагъбуруз куьмек гун яз гьисабна.
2018-йисалай инихъ Шамил Мейланова Саратовдин уронефрологиядин клиникада духтур-уролог яз кIвалахзава. Инал “кIвалахзава” гаф кхьейла, чи рикIел мад сеферда ада операция авур агъастIалви дишегьли Рабият Гьуьсейновади лагьай алхишдин келимаяр, газетрай чна кIелай макъалаяр хквезва. Низ чида, ихьтин алхишдин келимаяр Шамил Низамиевичаз гьикьван инсанри лагьанватIа ва лугьун хъийидатIа!
Коронавирусдин садакай масадак акатдай азар пайда хьайила чи кьегьал хци, югъ-йиф талгьана, кIвалахна, шумудни са кас ада кьиникьикай къутармишна, тIегъуьн чукIунин вилик пад кьун патал гьам клиникада, гьам шегьерда еке кIвалах тухвана. И бегьерлу зегьметдай ам шегьердин администрациядин патай чухсагъулдин чарчиз, Саратовский областдин здравоохраненидин министерстводин патай Гьуьрметдин грамотадиз лайихлу хьана.
Чаз мадни чир хьайивал, Шамил Низамиевича са шумудра шегьердин ва областдин урологрин арада тухвай пешекарвилин конкурсра иштиракна, кIвенкIвечи чкаяр кьуна. Ш.Мейланов Саратовский областда лап хъсан духтуррикай-урологрикай сад я.
Шамил Низамиевичакай макъала гьазурдайла, чи рикIел Англиядин писатель ва тарихчи Томас Карлейла кхьей гафар хтана: “Жуван пеше, кар жагъайди хушбахт кас я…”. Чавай лугьуз жеда хьи, Ш.Мейланов вичин кар жагъанвай, уьмуьрдин макьсад намуслувилелди тамамарунихъ ялзавай кас я.
Вахъ мягькем сагъламвал, гзаф четин, гьа са вахтунда герек ва гьуьрметлу кIвалахда мадни еке агалкьунар хьурай, гьуьрметлу Шамил духтур!
Асият Мирзалиева,
Хазран Кьасумов
