Мукьвара Кьурагьа, генерал Муьгьуьдин Къагьриманован экуь къамат рикIел хуьнин лишан яз, волейболдай 5-турнир кьиле тухвана.
Алатай йисара хьиз, цIини ина райондин жуьреба-жуьре идарайра зегьмет чIугвазвай ва спортдин и жуьредал рикI алай ксарикай ибарат тир са шумуд командади иштиракна. Къизгъиндаказ кьиле фейи акъажунрин нетижада 1-чкадиз “РОВД” команда лайихлу хьана. Кьурагьрин 1-нумрадин СОШ-дин муаллимрин ва “Ветеранар” командайри 2 ва 3-чкаяр кьуна.
Гъалиб хьайи вири командайрив райондин физкультурадинни спортдин ва жегьилрин крарин рекьяй комитетдин председатель Р.Рамазанова кубокар, медалар, грамотаяр ва пулдин пишкешар вахкана.
Турнирда виридалайни хъсандиз къугъвайбур Къазиев Магьарам (Кьурагьрин 1-нумрадин СОШ) ва Рашидов Али (“РОВД”) яз гьисабнава. Абур ва судьяйрин коллегияни кьилдин пишкешриз лайихлу хьана.
«Лезги газет»
