Октябрдин вацран эхирра Москвада ММА-дай кьиле фейи Россиядин чемпионатда Дагъустандин хкянавай командадик кваз иштиракай, вичин ери-бине Хив райондин ЧIилихъай тир Фазлудин Агьмадова къизилдин медаль къазанмишна. Гила адакай 3 сеферда Россиядин чемпион хьанва. Алай вахтунда чи ватандашди Европадин чемпионатдиз гьазурвилер аквазва…
РикIел хкин: Ф.Агьмадовахъ спортда хъсан нетижаяр икьван чIавалдини хьанай. Амма сифте ада панкратиондин, дзюдодин сирер чирна, спортдин и жуьрейрай агалкьунарни къазанмишна. ИкI, ам панкратиондай Дагъустандин 3 сеферда чемпион, дзюдодай лагьайтIа, спортдин мастервиле кандидат, Дагъустандин чемпион я. Гуьгъуьнлай ам яваш-яваш ММА-дал элячIна. Алай вахтунда ада тренер Эсед Эмирагъаеван гъилик вичин устадвал хкажзава. Спортдин и жуьредайни, аквазвайвал, йигин еришдалди виликди камар къачузва. Ам ММА-дай спортдин мастер я. 2019-йисуз дуьньядин Кубокни къазанмишна.
— Россиядин чемпионатдиз за саки са йисуз гьазурвилер акуна. И акъажунра пуд сеферда гъалибвал къазанмишна. Финал патал бягьс виридалайни четинди хьана: зини захъ галаз бягьсиниз экъечIнавай спортсмендин къуватар сад хьтинбур тир. Анжах алава 3-раундда, бамишардай къайда ишлемишуналди, залай гъалибвал къазанмишиз алакьна, — суьгьбетзава спортсменди.
Чаз мадни чир хъхьайвал, ДГУ-дин физический культурадин ва спортдин факультетдин студент тир Ф.Агьмадова мукьвара OFS промоушендихъ галаз икьрар кутIуннава. Пешекарвилин спортда сад лагьай бягьс чи ватандашди къведай йисан мартдиз кьиле тухун пландик кутунва. Къуй адахъ спортдин мадни еке кукIушар муьтIуьгъардай къуватар хьурай!
Рагнеда Рамалданова
