Акьалтзавай несилдиз хайи чIал кIанарунин, аялрик ам чирунин гьевес кутунин макьсаддалди алай йисан 25-октябрдилай 30-октябрдалди инстаграмда кардик квай “Ахцегь-транзит” (@Akhty_tranzit) аккаунтда хайи чIалан конкурс кьиле тухунин гьакъиндай виликамаз хабар ганвай.
Гъалибчийриз, иштиракчийриз пишкешар гун патал хайи чIалахъ рикI кузвай ватанперес, меценат, карчи Нариман Гъазалиевич Гъазалиева 100 агъзур манат пул чара авуна.
Конкурсда 3-12 йис тамам хьанвай аялриз иштиракдай ихтияр авай. Аялри, са шиир урус чIалай лезги чIалаз таржума авуна, ам фасагьатдаказ кIелзавай видеоролик гьазурна, тешкилатчийриз ракъурна кIанзавай. Конкурс интернетдин куьмекдалди тухвайвиляй неинки Кьиблепатан Дагъустанда яшамиш жезвай аялриз, гьакI жуьреба-жуьре шегьерра авайбурузни иштиракдай мумкинвал хьана.
Конкурсдин нетижада 1-чка 8 йис тамам хьанвай ахцегьви Тагьиров Юсуфа кьуна (адаз 15 агъзур манат пул ва @Akhty_tranzit таксидин фирмадин патай 5 сеферда пулсуздаказ таксидикай менфят къачудай сертификат гана).
2-чка Санкт-Петербургда авай, 4 йис тамам хьанвай Жигерова (Джигерова) Самиради кьуна (адаз 10 агъзур манат пул ва @Akhty_tranzit таксидин фирмадин патай 3 сеферда пулсуздаказ таксидикай менфят къачудай сертификат гана).
3-чка Москвадин областдин Дрезна шегьерда яшамиш жезвай, 8 йис тамам хьанвай Муслимова Алияди кьуна (адаз 7 агъзур манат пул ва @Akhty_tranzit таксидин фирмадин патай 2 сеферда пулсуздаказ таксидикай менфят къачудай сертификат гана).
Конкурсдин тешкилатчийри кьве сеферда пулсуздаказ таксидикай менфят къачуз жедай сертификатар тафаватлу хьайи мад 2 иштиракчидив вахкун кьетIна — Балакова Аминадивни (5 йис, КьакIарин хуьр) Шалиева Хадижадив (12 йис, Ахцегь).
Идалайни гъейри, конкурсда иштиракай гьар са аялдив грамота ва агъзур манатдин пулдин пишкеш вахкана.
Тешкилатчийри къейд авурвал, гъалибчиди ва хъсан чкаяр кьурбуру чпиз гайи пулдин пишкешар яшайишдин жигьетдай дарда авай хизанрив (Ахцегьа) вахкана.
«Лезги газет»
